Qulsaryda sý tasqynynan zardap shekken otbasy ótemaqyǵa kottedj satyp aldy

ATYRAÝ. KAZINFORM – Atyraý oblysynyń Qulsary qalasynda sý tasqynynan zardap shekken otbasy ótemaqy qarjysyna eki qabatty kottedj satyp aldy.

Atyraý oblysy ákiminiń baspasóz qyzmetinen málim etkendeı, Qulsary qalasynda úıin tasqyn sý basqan 2 633 otbasyǵa ótemaqy berilgen.

Sý tasqynynan zardap shekkenderdiń qatarynda Qadyrbek Qospaqov ta bar. Onyń úıine 5 sáýirde tasqyn sý kirgen.

«Tasqyn sý tez keldi. Tipti zattarymyzdy jınaýǵa, kıimderimizdi alýǵa úlgermedik. Qujattarymyzdy ǵana alyp, baspanamyzdy tastap ketýge májbúr boldyq. Sý deńgeıi tez kóterilip, 20 kúnde úıimiz jaramsyz bolyp qaldy. Sol sebepten, kórshiles Mańǵystaý oblysyndaǵy Boranqul aýylyna baryp, ýaqytsha panaladyq. Keıin Jylyoı aýdandyq ákimdiginen kómek berildi», - deıdi Qadyrbek Qospaqov.

Onyń aıtýynsha, arnaıy komıssııa músheleri burynǵy úıine zerdeleý júrgizgen. Baǵalaý komıssııasynyń mamandary onyń úıin jaramsyz dep tanýǵa sheshim shyǵarǵan.

«Maýsym aıyna deıin otbasymyz týraly, jaramsyz dep tanylǵan úıimniń qujattaryn arnaıy komıssııaǵa tapsyrdyq. Ótemaqy qarjysyn eseptep berdi. Bes jumys kúninde arnaıy esepshotyma ótemaqy qarjysy tústi. Ótemaqyǵa berilgen qarjynyń mólsheri kóńilimnen shyqty», -deıdi Qadyrbek Qospaqov.

Ol ótemaqy qarjysyn alǵan soń jańa baspanany Atyraý, Aqtaý jáne Aqtóbe qalasynan satyp alý nusqasyn qarastyrǵan.

«Jańa baspana izdep, biraz júrip qaldyq. Ótemaqy qarjysyna ózge qalalardan úı satyp alatyndaı múmkindik boldy. Biraq, týǵan jer ystyq bolady eken. Basqa qalaǵa kóship kete almadyq. Sol sebepten, Qulsarydan eki qabatty kottedj satyp aldyq», -dedi Qadyrbek Qospaqov.

Qazir onyń otbasy jańa baspanasy kóship kelgen.

Eske sala ketelik, budan buryn Qulsary halqyna úı satyp alýǵa, jóndeýge 70 mlrd teńge aýdarylǵanyn habarlaǵan bolatynbyz.

Al, keshe Qulsaryda sý tasqynynan zardap shekken kásipkerlerge 2,6 mlrd teńge ótemaqy taǵaıyndalǵanyn jazǵan edik.