Qulsaryda sý tasqynynan zardap shekken 57 kásipkerdiń 1,1 mlrd teńge shyǵyny áli ótelmegen
ATYRAÝ. KAZINFORM – Atyraý oblysynda sý tasqynynan zardap shekken 57 kásipkerdiń shyǵynyn óteýge 1,1 mlrd teńge qajet. Bul qarjy respýblıkalyq bıýdjetten kútilip otyr.
Atyraý oblysy ákiminiń orynbasary Marat Mýrzıevtiń málimetinshe, Qulsary qalasyndaǵy sý tasqynynan 337 kásipker zardap shekken.
«Jylyoı aýdanyndaǵy kóktemgi sý tasqyny kezinde zardap shekken kásipkerlerdiń zalal somasyn óteýdi kózdeıtin óńirlik komıssııanyń 21 otyrysy ótti. Komıssııa otyrysynda 302 kásipkerdiń zalal somasyn óteý týraly 345 ótinimi maquldandy. Keıbir kásipkerler 2-3 ótinimmen júgindi. Osy kezge deıin 288 ótinimge sáıkes 3 mlrd teńge kóleminde zalal somasy tolyqtaı óteldi. Endi 57 ótinim boıynsha respýblıkalyq bıýdjetten 1,1 mln teńge kóleminde qarjy kútilip otyr. Óńirlik komıssııanyń aldaǵy kezekti otyrysynda 35 kásipkerdiń ótinimi qaralyp, tıisinshe sheshim qabyldanady», - dep habarlady Marat Mýrzıev.
Ákim orynbasarynyń deregine súıensek, Atyraý qalasy men Mahambet aýdanynda jeke kásipkerligi, jaýapkershiligi shektelgen seriktestigi bar 9 kásipkerge 1,2 mlrd teńge kóleminde zalal kelgen. Sondaı-aq, óńirdegi 73 sharýa qojalyǵynyń jyljymaıtyn múlkine keltirilgen zalal somasy aldyn-ala esep boıynsha 2,9 mlrd teńge kólemin quraǵan.
«Kásipkerlerdiń zalal somasy óteý josparlanyp otyr. Memleket shaǵyn bızneske kómektesedi. Birinshi kezekte bári múliktiń qalaı baǵalanatynyna baılanysty júzege asady», - dep málim etti Marat Mýrzıev.
Eske sala ketelik, buǵan deıin Atyraý oblysynda sý tasqynyna baılanysty sotqa 133 talap aryz túskenin jazǵan bolatynbyz.
