Qulsaryda sý tasqynynan keıin boı kótergen jańa shaǵyn aýdanǵa avtobýs qatynaıdy

ATYRAÝ. KAZINFORM – Atyraý oblysynnyń Qulsary qalasynda sý tasqynynan keıin boı kótergen jańa shaǵyn aýdan turǵyndary úshin qoǵamdyq kólik qatynaıtyn boldy.

Jylyoı aýdandyq ákimdiginiń málimetinshe, Qulsary qalasy men «Bolashaq» shaǵyn aýdany aralyǵyna qatynaıtyn qoǵamdyq kólik 1 qazannan bastap júre bastaıdy. 

«Atalǵan shaǵyn aýdanǵa qalaishilik №9 marshrýt qatyraıdy. Bul marshrýtta jelige 6 avtobýs bólinedi», -dep habarlady aýdandyq ákimdikten. 

Ákimdiktiń deregine qaraǵanda, «BatysTehInvest» JShS-niń qoǵamdyq kólikteri Qulsary qalasynda jáne 5 aýyldyq, 1 kenttik okrýgke 12 baǵytpen jolaýshy tasymaldaıdy. Seriktestik 2019 jyly qurylǵan. Qazir seriktestiktiń balansyndaǵy «Ankaı», «Paz Vektor», «Gazel Nekst» sekildi 80-ge jýyq avtobýstyń 27-si jaqynda alynǵan. 

«Qoǵamdyq kólikter sońǵy úlgidegi árqaısysy 22 oryndyq Yutong avtobýsymen tolyqty. Atalǵan avtokólikter Qulsary qalasynyń aýmaǵynda jolaýshy tasymaldaıdy. Tehnıkalar metan gazymen júredi», - dep málim etti aýdandyq ákimdikten. 

Eske sala ketelik, budan buryn Qulsaryda sý tasqynynan zardap shekkender úshin jańa shaǵyn aýdan salynyp jatqanyn habarlaǵan edik. 

Keıin tasqyn sý basqan Qulsarynyń turǵyndaryna 62 úı berilgenin jazǵan bolatynbyz.