Qulsaryda sý tasqyny saldarynan búlingen kópir jóndelip jatyr

ATYRAÝ. KAZINFORM – Byltyr Atyraý oblysynyń Qulsary qalasyndaǵy sý tasqyny kezinde kópir búlingen edi. Atalǵan kópirdi jóndeý jeltoqsan aıynan beri júrip jatyr.

Kópirdi jóndeýdi «QazAlem» JShS qolǵa alǵan. Seriktestik ókili Daýylbaı Kemalovtyń aıtýynsha, jumysty qyrkúıekte bastaý kózdelgen. Alaıda kommýnıkatsııa jelilerin kópir astymen ótkizilgeni kedergi keltirgen. 

– Jeltoqsan aıyna deıin kommýnıkatsııa jelileri júrgizildi. Jóndeý jumysy 12 jeltoqsanda bastaldy. Qazir qurylys jumysyna 40 adam, 20 tehnıka tartyldy. Kópirge 10 baǵana ornatylady. Jóndeý jumysyn naýryzda aıaqtaýdy josparlap otyrmyz, - deıdi Daýylbaı Kemalov. 

Onyń aıtýyna qaraǵanda, qurylys materıaldary kórshiles Reseı Federatsııasynan tasymaldanyp jatyr. Qurylysshylar kúnine 10 saǵattan jumys isteıdi. 

– Jóndeý jumysyn belgilengen merzimde aıaqtaýdy kózdedik. Sol sebepten, kúndizgi jumys 10 saǵatqa deıin sozylady. Aldaǵy ýaqytta túngi aýysymmen jumys isteýge týra kelýi múmkin, - dep málim etti Daýylbaı Kemalov. 

Eske sala ketelik, budan buryn Atyraý oblysy kóktemgi sý tasqynyna qalaı daıyndalyp jatqanyn jazǵan edik.