Qulsaryda órtengen janar-jaǵar maı stansasy jobalaý qujatynsyz jumys istegen
ATYRAÝ. KAZINFORM — Atyraý oblysynyń Jylyoı aýdanynyń ortalyǵy — Qulsary qalasynda janar-jaǵar stansasynda gaz-aýa qospasy jarylǵan edi. Sonyń saldarynan bolǵan órtten 14 turǵyn kúıik alyp, 2 adam ajal qushty.
Atyraý oblysy ákiminiń orynbasary Qaırat Nurtaevtyń deregine qaraǵanda, qazir Qulsary qalasyndaǵy órtke baılanysty tergeý isi júrip jatyr. Tergeý 1 aıǵa sozylady.
— Atyraý qalasy men aýdandarda komıssııa qurylady. Komıssııalarǵa ákimderdiń orynbasarlary tóraǵalyq etedi. Bul komıssııalar Atyraý qalasy men aýdandarda tek gaz quıý beketin emes, janar-jaǵar maı quıatyn nysandardyń barlyǵyn tekserýi kerek. Barlyq jumys zań talaptaryna saı atqarylady. Qazir Atyraý qalasynda mundaı beketterdiń qaı jerde ornalasqany týraly negizgi tizim bar. Bizge adamdardyń ómirine qaýip tóndirip turǵan nysandardy anyqtaý qajet, — deıdi Qaırat Nurtaev.
Al Atyraý oblystyq tótenshe jaǵdaılar departamenti bastyǵynyń orynbasary Syrym Jaımaǵambetovtyń pikirinshe, Qulsaryda órtengen «Nıet» janar-jaǵar beketine qatysty málimetti jarııa etti.
— Bul bekettiń jobalaý qujattarynsyz jumys istegeni anyqtalǵan. Azamattyq qorǵaý týraly zańynyń 77-babyna sáıkes tótenshe jaǵdaılar departamentine tirkelmegen, — dedi Syrym Jaımaǵambetov.
Eske sala ketelik budan buryn Qulsaryda gaz-aýa qospasy jarylyp, 2 adam qaza tapty.
Keıin Qulsarydaǵy jarylys janar-jaǵarmaı beketindegi rezervýarǵa gaz quıý kezinde bolǵany anyqtaldy.