Qulsaryda esepte turǵan 4 myń naýqasqa 19 mln teńgeniń tegin dári-dármegi berilmegen
ATYRAÝ. KAZINFORM – Atyraý oblysyndaǵy Qulsary qalasynda esepte turǵan 4 myńnan astam naýqasqa 19 mln teńgeniń tegin dári-dármegi berilmeı kelgeni anyqtaldy.
Jylyoı aýdandyq prokýratýrasy dárigerlerdiń azamattarǵa tegin medıtsınalyq kómektiń kepildik berilgen kólemimen qamtamasyz etý mindetterin elemeý faktilerin anyqtady.
«Atap aıtqanda, aýdandyq ortalyq aýrýhanada esepte turǵandyqtan tegin dári-dárimek alatyn naýqastardyń sany negizsiz qysqartylǵan. Dári-dármek jetkizýshimen dárilik zattar ýaqtyly jetkizilmegen. Aýdandyq prokýratýranyń qadaǵalaý aktisi boıynsha aýdandyq ortalyq aýrýhanada qant dıabeti, arterıaldyq gıpertenzııa dıagnozdarymen esepte turǵan 4 myń 54 adamǵa 19 mln 155 myń 349 teńgeniń 4 866 qaptama kóleminde dári-dármekteri berildi. Onyń ishinde Djardıns, Invokana, Trajenta, Forsıga jáne taǵy basqa dáriler bar. Osylaısha, aýdandyq prokýratýra turǵyndardyń konstıtýtsııalyq quqyqtaryn qalpyna keltirdi», -dep habarlady Atyraý oblystyq prokýratýrasynan.
Anyqtalǵan derekke baılanysty Jylyoı aýdandyq ortalyq aýrýhanasynyń jaýapty laýazymdy tulǵasy tártiptik jaýapkershilikke tartyldy.
Eske sala ketelik, budan buryn Atyraýda medıtsına mekememeleriniń dırektorlary JOO-da oqý úshin bıýdjettiń 10,5 mln teńgesin jumsaǵanyn jazǵan bolatynbyz.
