Qulsaryda baspanasyn qalpyna keltirýge ótemaqy alǵandar sany 1100-den asty

ATYRAÝ. KAZINFORM – Atyraý oblysyndaǵy Qulsary qalasynda baspanasyn qalpyna keltirýge ótemaqy alǵan turǵyndar sany 1100-den asty.

Atyraý oblysynyń jedel shtabynan málim etkendeı, Qulsary qalasynda mobıldi top músheleri turǵyndarǵa 2 583 úıge baǵalaý jáne tehnıkalyq zerdeleý jumystarynyń qorytyndysyn tanystyrǵan. 

«Qazir Qulsary qalasynyń 1 594 turǵyny ótemaqy alý týraly kelisimshartqa qol qoıdy. Jergilikti 1165 turǵynǵa ótemaqy qarjysy tólendi. Onyń ishinde 722 turǵyn baspana satyp alý, 443 adam turǵyn úıin jóndeý-qalpyna keltirý jumystary úshin tólem aldy», - dep habarlady oblystyq jedel shtab.

Qulsary qalasynyń turǵyny Segiz Berdiqulov sarapshylardyń búlingen múlikti baǵalaý qorytyndysymen kelisip otyr. Sol sebepten, endi Jylyoı aýdanynyń ákimdigine júginip, ótemaqyny aqshalaı alǵysy keledi. 

Al, 5-ýchaske turǵyny Qojantaı Dáýitovke de baǵalaý komıssııasynyń qorytyndysy berilgen. 

«Tasqyn sýdan búlinip qalǵan múlikterimdi ádil baǵalandy dep oılaımyn. Endi soǵan baılanysty tólenetin qarajatpen úıimdi tolyq qalpyna keltirýdi oılastyryp otyrmyn», - deıdi Qojantaı Dáýitov. 

Sondaı-aq, búgin tehnıkalyq zerdeleý qorytyndysyn qaıta qaraý bastalǵan. Buǵan turǵyndardyń ótinishinde kórsetilgen eskertýler sebep bolǵan. 

Eske sala ketelik, buǵan deıin Qulsarynyń 606 turǵyny baspanasyn qalpyna keltirý úshin ótemaqy alǵanyn jazǵan bolatynbyz.