Qulsaryda azyq-túlikke talasqan áıelderdiń isi sotta qaraldy

ATYRAÝ. KAZINFORM – Atyraý oblysynyń Qulsary qalasynda azyq-túlikke talasqan áıelderdiń isi sotta qaraldy.

Jylyoı aýdandyq sotynyń málimetinshe, janjal mamyr aıynda Qulsary qalasyndaǵy «Naqysh» ǵımaratynda bolǵan. 

«Gýmanıtarlyq kómek retinde jetkizilgen azyq-túlikke talasqan eki áıel T. men D. ózara kelise almaı qalǵan. Sol kezde D. jábirlenýshi T.-ny ıterip qulatqan. Sonyń nátıjesinde jábirlenýshi jeńil dene jaraqatyn alǵan. Bul is QR Ákimshilik quqyq buzýshylyq týraly kodeksiniń 73-1-babynyń 1-bóligimen (Densaýlyqtyń qysqa merzimge buzylýyna nemese jalpy eńbek qabiletin turaqty túrde bolmashy joǵaltýǵa ákep soqqan, densaýlyqqa qasaqana jeńil zııan keltirý) qaraldy», - dep habarlady aýdandyq sot. 

Quqyq buzýshy D.-nyń kinási sot-medıtsınalyq saraptama qorytyndysymen, beıne-dybys jazbasymen, aryzben, túsiniktemelermen, ákimshilik quqyq buzýshylyq týraly hattamamen jáne basqa da is qujattarymen tolyqtaı dáleldenip otyr. Sot-medıtsınalyq saraptama qorytyndysyna sáıkes, jábirlenýshi T.-nyń densaýlyǵyna jeńil dárejeli zııan kelgeni anyqtalǵan.

«D.-nyń kinásin jeńildetetin mán-jaı retinde onyń buryn ákimshilik jaýaptylyqqa tartylmaǵany, 14 jasar balasynyń bary eskerildi. Aýyrlatatyn mán-jaılar anyqtalmady. Sot D.-nyń jeke basyn, quqyq buzýshylyqtyń sıpatyn, jaýaptylyǵy men jazasyn jeńildetetin mán-jaılardy eskerip, oǵan QR Ákimshilik quqyq buzýshylyq týraly kodeksiniń 829-11-babynyń 2-bóligimen 38 myń 766 teńge kóleminde ákimshilik aıyppul saldy», - dep málim etti aýdandyq sottan.

Sot qaýlysy zańdy kúshine engen joq.

Eske sala ketelik, buǵan deıin sot ǵımaratynda ózine pyshaq salǵan atyraýlyqqa qylmystyq is qozǵalǵanyn jazǵan edik.