Qulsaryda áleýmettik mańyzy bar azyq-túlikterdiń baǵasy baqylaýǵa alyndy

ATYRAÝ. KAZINFORM – Jylyoı aýdanynyń ortalyǵy – Qulsary qalasynda áleýmettik mańyzy bar azyq-túlikterdiń baǵasy baqylaýǵa alyndy. 

Atyraý oblysy boıynsha saýda jáne tutynýshylar quqyǵyn qorǵaý departamentiniń bas mamany Sábıt Súleımenovtiń aıtýynsha, Qulsary qalasyndaǵy dúkender men bazarlarda, sýpermarketterde azyq-túlikterdiń baǵasyna monıtorıng júrgizilgen.

«Atyraý oblysynda áleýmettik mańyzy bar 19 túrli azyq-túlikke shekti baǵa bekitildi. Sol sebepten, saýda núktelerinde kúndelikti tutynatyn mundaı azyq-túlikterdiń baǵasy belgilengen shekten aspaýǵa tıis. Turǵyndar baǵanyń óskenin baıqasa, E-ótinish platformasy arqyly nemese bizdiń departamentke shaǵym bere alady. Azyq-túliktiń baǵasyna baılanysty monıtorıng Atyraý qalasy men aýdandarda apta saıyn júrgiziledi. Basty maqsatymyz – azyq-túlikterdiń, ásirese, áleýmettik mańyzy bar túrleriniń baǵasyn negizsiz ósirýge jol bermeý», - dedi Sábıt Súleımenov.

Qazir Qulsary qalasynda azyq-túlik satatyn 150-ge jýyq saýda núktesi jumys istep tur. Al, áleýmettik mańyzy bar azyq-túlik túrleri «Lıder» sýpermarketiniń eki núktesi arqyly qoljetimdi baǵamen satylady.

Eske sala ketelik, Qulsaryda azyq-túlikke talasqan áıelderdiń isi sotta qaralǵanyn jazǵan bolatynbyz.