Qulsaryda ákimdikti, áleýmettik nysandar men ortalyq stadıondy sý basty

ATYRAÝ. KAZINFORM – Atyraý oblysyndaǵy Qulsary qalasynda turǵyn úılerdi, ákimdik ǵımaratyn, ınfraqurylymdyq nysandar men ortalyq stadıondy sý basty.

Jylyoı aýdany ákimdiginiń málimetinshe, keshe, 4 sáýirde tasqyn sýdyń qaýpine baılanysty tótenshe jaǵdaı jarııalandy. Al búgin, 5 sáýirde saǵat 09:30 shamasynda Jem ózenindegi sý kóterilgen.

Qulsary qalasynyń ortasymen aǵatyn Qursaı ózeginiń arnasyna sý asqan. Aldymen Jadyrasyn shaǵyn aýdanyn, 2 jáne 3-aýylǵa tasqyn sý kirgen. Búgin saǵat 17:00-ge deıin Qulsary qalasynda 500-den astam nysandy tasqyn sý basqan. Onyń ishinde turǵyn úıler, áleýmettik nysandar, ákimdik ǵımaraty men saýda ortalyǵy bar. Ortalyq stadıon da tasqyn sýdyń ortasynda qalǵan.

Bul aýdandaǵy turǵyndar sany – 86 939. Turǵyndardyń arasynda 7400 zeınet jasynda adam, 2 465 múgedek, 1004 júkti áıel, kámeletke tolmaǵan 37069 bala bar. Atyraý oblysynyń ákimi Serik Shápkenov keshe, 4 sáýirden beri Jylyoı aýdanyndaǵy tasqyn sýdan qorǵaý jumysyna jetekshilik etip júr.

Tasqyn sýdyń aǵynyn Kaspıı teńizine qaraı burý úshin Jem ózeniniń arnasy eki jerden jarylǵan. Ózen arnasyn taǵy eki ret jarý josparlanǵan

«Qulsaryda saǵat 18:00-ge deıin 2 myń 400 turǵyn qaýipsiz aýmaqqa kóshirildi. Turǵyndar arnaıy bólingen qabyldaý pýnktterine ornalastyryldy. Endi evakýatsııalanatyn turǵyndar úshin «Teńiz» ken ornyndaǵy vahtalyq kentten jataqhanalar daıyndalyp jatyr», - dep habarlady oblystyq jedel shtabtan.

Eske sala ketelik, budan buryn tasqyn sýdyń qaýpine baılanysty Jylyoı aýdanynda tótenshe jaǵdaı jarııalandy.

Kúndiz Qulsarydan Dossorǵa deıingi joldyń bir bóligin sý basty.

Búgin tasqyn sý Qulsary qalasyna kire bastaǵanyn habarlaǵan bolatynbyz.