Qulsaryda 100 úıdiń irgetasy quıylyp, 78-niń qabyrǵasy qalandy
ATYRAÝ. KAZINFORM – Atyraý oblysyndaǵy Qulsary qalasynda sý tasqynynan keıin 100 úıdiń irgetasy quıylyp, 78-niń qabyrǵasy qalandy. Endi úılerdiń shatyryn jabý, sylaý jumysy bastaldy.
Atyraý oblysy ákiminiń baspasóz hatshysy Rýslan Jumaǵazıevtiń málimetinshe, Qulsary qalasyndaǵy «Bolashaq» shaǵyn aýdanynda 100 turǵyn úıdiń qurylysy júrip jatyr. Bul úıler sý tasqyny kezinde baspanasy jaramsyz bolǵan turǵyndarǵa beriledi.
«Jylyoı aýdanynyń ortalyǵy – Qulsary qalasynda jańadan boı kóteretin 100 turǵyn úıdiń irgetasy tolyq quıyldy. Al, 78 úıdiń qabyrǵasyn qalaý jumystary aıaqtaldy. Osyndaı jumystardan soń 34 úıdiń shatyryn jabý júrip jatyr. Shatyry tolyq jabylǵan 22 úıdiń qabyrǵalaryna ishki, syrtqy sylaq jumysy bastaldy», -dep habarlady Rýslan Jumaǵazıev.
Onyń aıtýynsha, «Bolashaq» shaǵyn aýdanynda salynyp jatqan úılerdiń 30-na elektr jelisi júrgizilgen. Sondaı-aq, 16 úıge sý jáne káriz jelisi tartylǵan.
«Qulsary qalasyndaǵy sý tasqynynan zardap shekken turǵyndarǵa arnalǵan 80 úıdiń qurylysyna «Qazaqstan halqyna» qorynan qarjy bólindi. Al, 20 baspana jergilikti bıýdjettiń qarjysyna salynyp jatyr. Qurylys jumystaryn júrgizý úshin jergilikti 8 merdiger kompanııa tańdaldy. Bul kompanııalarda jumys isteýge 374 adam tartyldy», -dep málim etti Rýslan Jumaǵazıev.
Eske sala ketelik, «Qazaqstan halqyna» qorynyń baspasóz qyzmetinen málim etkendeı, Qulsary qalasynda 80 turǵyn úıdiń qurylysyna 2 mlrd 640 mln teńge bólingen. Munda 1 úıdi salýǵa jumsalatyn qarjy 31 mln 975 myń teńgeni quraıdy.
Tıptik úlgidegi jańa úılerdiń árqaısysynyń aýdany – 100 sharshy metr. Qulsaryda jańa turǵyn úılermen birge 2 myń oryndyq Binom mektebin, 300 oryndyq balabaqsha nysanyn salý josparlanǵan. Sondaı-aq shaǵyn alleıalar salynady.
«Turǵyn úılerdiń avtorlyq dızaınyn «ETALON PROJECT GROUP» JShS daıyndady. Bul seriktestik dızaınnyń saqtalýyna baqylaý júrgizedi. Al, tehnıkalyq qadaǵalaý «ZAF-Stroıservıs» JShS-ǵa júktelip otyr», - dep málim etti qordyń baspasóz qyzmetinen.
Budan buryn sý basqan Qulsary qalasynda 100 úıdiń qurylysy qalaı júrip jatqanyn jazǵan bolatynbyz.
Sondaı-aq, Qulsary halqyna úı satyp alýǵa, jóndeýge 70 mlrd teńge aýdarylǵanyn habarlaǵan edik.
