Qulsary turǵyndaryna ólgen mal úshin 123,8 mln teńge ótemaqy tólendi

ATYRAÝ. KAZINFORM — Atyraýdaǵy Qulsary qalasynyń turǵyndaryna sý tasqyny kezinde ólgen mal úshin 123,8 mln teńge ótemaqy tólendi.

Jylyoı aýdandyq kásipkerlik jáne aýyl sharýashylyǵy bóliminiń basshysy Nurtas Qýatbaevtyń aıtýynsha, osy kezge deıin turǵyndardan 101 ótinish túsken. 

«Turǵyndardan ótinish qabyldaý áli de jalǵasyp jatyr. Arnaıy komıssııa 15 jumys kúni ishinde barlyq qujatty qaraıdy. Ótemaqy malynan aıyrylǵan azamattyń jeke esepshotyna aýdarylady. Buǵan deıin qabyldanǵan ótinishter boıynsha zalal tolyǵymen óteldi. Osy kezge deıin malynan aıyrylǵan turǵyndardyń esepshotyna 123,8 mln teńge ótemaqy aýdaryldy», -dep habarlady Nurtas Qýatbaev.

Máselen, Qosshaǵyl aýyldyq okrýginde tirkelgen «Qaraǵaı» sharýa qojalyǵynyń jetekshisi Aıtýar Myrzaǵalıevtyń 2 jylqysy tasqyn sýǵa batyp ketken.

Ol osyǵan baılanysty kásipkerlik jáne aýyl sharýashylyǵy bólimine ótinish bergen.

«Bizge baǵalaý komıssııasynyń músheleri kelip, barlyq qujatty zerdeledi. Biraz ýaqyttan keıin zalaldy baǵalaý qorytyndysyn habarlady. Eseptelgen qarjy kólemine kelisim bergen soń, esepshotqa ótemaqy tústi», — dedi Aıtýar Myrzaǵalıev. 

Al, Aıda Erkinǵalıeva jetekshilik etetin «Erkinqalıeva» sharýa qojalyǵynan 2 sıyr men 4 qoshqar ólgen. Arnaıy komıssııanyń qorytyndysymen zalaldyń jalpy somasy 1,2 mln teńgeni qurap otyr. 

«Sý tasqyny kezinde malymnyń ólgeni týraly kásipkerlik jáne aýyl sharýashylyǵy bólimine júgingen edim. Komıssııanyń baǵalaý qorytyndysymen ólgen mal úshin zalal kólemi tolyǵymen óteldi», -deıdi Aıda Erkinqalıeva. 

Eske sala ketelik, budan buryn Qulsary turǵyndarynyń 876 maly men 532 qusy tasqyn sýdan ólgenin habarlaǵan bolatynbyz.