Qulsary turǵyndary aldaǵy 2-3 kúnde ótemaqy alý úshin ákimdikke júgine alady

ATYRAÝ. KAZINFORM – Qulsary qalasyndaǵy tasqyn sýdan zardap shekken turǵyndar aldaǵy 2-3 kúnde ótemaqy alý úshin ákimdikke júgine alady. 

Jylyoı aýdanynyń ákimi Jumabek Qarajanovtyń aıtýynsha, búgin arnaıy qurylǵan mobıldi toptar turǵyndarǵa tasqyn sýdan búlingen úılerdi baǵalaý nátıjesimen tanystyrýdy bastady.

«Qulsary qalasynda 2 700-ge jýyq úıge tehnıkalyq tekserý júrgizildi. Búgin, 15 mamyrda 100-den astam úıge qatysty tehnıkalyq qorytyndy shyǵaryldy. Tasqyn sý basqan úılerdi kúrdeli jóndeýge qajet jáne avarııalyq jaǵdaıdaǵy úılerdi baǵalaýǵa baılanysty qarjy naryqtyq quny negizinde esepteledi. Keltirilgen zalaldy baǵalaýdyń nátıjeleri kún saıyn shyǵarylyp, turǵyndarǵa mobıldi toptardyń músheleri taratady. Baǵalaý nátıjelerine kelisim bergen turǵyndar aldaǵy 2-3 kún ishinde ótemaqy alý jóninde jergilikti ákimdikke júgine alady», - dedi Jumabek Qarajanov. 

Onyń aıtýyna qaraǵanda, Jylyoı aýdanynyń ákimdigi ótemaqy tóleý boıynsha eki baǵytta jumys isteıdi. 

«Birinshiden, turǵyn úıge jóndeý júrgizý qajet dep tabylsa, oǵan jumsalatyn qarjysy tólenedi. Ekinshiden, turǵyn úı avarııalyq jaǵdaıda dep tanylsa, memleket esebinen jańa úı salynady. Munyń taǵy bir joly – úı ıelerine Qulsary qalasynan nemese Atyraý oblysynyń aýmaǵyndaǵy kez kelgen eldi mekennen turǵyn úı satyp alyp berý. Turǵyndarǵa búlingen múlkine baılanysty ótemaqy beriledi», - dep málim etti Jumabek Qarajanov.

Eske sala ketelik, budan buryn Tasqyn sý basqan Qulsarynyń turǵyndary aýdandyq ákimdik aldyna jınalǵanyn jazǵan bolatynbyz.