Qulsary kóshelerinen 25 myń tonnadan astam turmystyq qaldyq shyǵaryldy
ATYRAÝ. KAZINFORM – Tasqyn sý basqan Qulsary qalasynyń kóshelerinen 25 myń tonnadan astam turmystyq qaldyq shyǵaryldy.
«Jylyoı Tazalyq» JShS-niń dırektory Baýyrjan Abdrahmanovtyń aıtýynsha, «West Dala» JShS-dan qoqys konteınerin tasıtyn 2 arnaıy kólik ákelingen. Al, kóshelerge árqaısysynyń kólemi 8 myń tekshe metrlik 20 konteıner qoıylǵan.
«Qazir kommýnaldyq kásiporynnyń qyzmetkerleri Qulsary qalasynyń eki aı buryn sý basqan kóshelerinen turmystyq qaldyqtardy shyǵarýdy jalǵastyryp jatyr. Bul jumysqa kásiporynnyń 50 jumysshysy, 20 arnaıy tehnıka tartyldy. Turmystyq qaldyqtar arnaıy polıgonǵa jetkiziledi. Arnaıy komıssııanyń sheshimimen apatty dep tanylǵan úılerdi buzý, keıbir baspanany jóndeý, qalpyna keltirý jumysy qolǵa alynǵan. Sol sebepten, turmystyq qaldyqtardy shyǵarý jalǵasa beredi», - dedi Baýyrjan Abdrahmanov.
Onyń aıtýyna qaraǵanda, «Atyraý», «Jadyrasyn», «Avtodorojnık-2 shaǵyn aýdandary qoqystan tolyq tazartylǵan. Endi 2-aýyl, 4-aýyl, «Avtodorojnık-1», «Dostyq» shaǵyn aýdandarynan qoqys jınaý júrgizilip jatyr.
Eske sala ketelik, budan buryn Qulsaryda jańa turǵyn úılerdiń qabyrǵasy qalanyp jatqanyn habarlaǵan edik.
