Qulsary qalasynda saýda oryndary ashylyp, avtobýs júre bastady

ATYRAÝ. KAZINFORM – Atyraý oblysyndaǵy Qulsary qalasynda saýda oryndary ashylyp, avtobýs júre bastady. 

Jylyoı aýdany ákiminiń orynbasary Gúlnafıs Aıshýaqovanyń aıtýyna qaraǵanda, sýda oryndary qalypty jumysyna kiristi. Onyń ishinde 100 azyq-túlik dúkeni, 2 iri sýpermarket, 3 iri kóterme saýda bazary bar. Sondaı-aq, 20-ǵa jýyq dárihana qaıtadan ashyldy.

«Qaladaǵy qoǵamdyq tamaqtaný oryndary da qalypty jumysqa kiristi. Táýlik boıy jumys isteıtinderi bar. Saýda oryndarynyń ıelerine túsindirý jumysy júrgizilip, baǵany negizsiz qymbattatpaýdy qadaǵalap otyrmyz», - dedi Gúlnafıs Aıshýaqova.

Sondaı-aq, «Batys Teh Invest» JShS basshysy Áýez Ábilákimtiń málimetine súıensek, jolaýshy tasymaldaıtyn qoǵamdyq kólikter reıske shyqty.

«Tótenshe jaǵdaı jarııalanǵanǵa deıin Qulsary qalasynda 55 avtobýs 12 baǵytta jolaýshy tasymaldaǵan edi. Qazir qalada 14 avtobýs 4 baǵytta jolaýshy tasymaldap júr. Budan bólek Qosshaǵyl, Jańa Qaraton, Maıkómgen, Jem aýyldyq okrýgterine qatynaıtyn avtobýstar qalypty jumysyna kiristi», - dedi Áýez Ábilákim. 

Onyń aıtýynsha, Qulsary qalasynyń kósheleri sýdan tazartylǵan soń qoǵamdyq kólik sany artady.

Eske sala ketelik, buǵan deıin Qulsary qalasynyń kóshelerinen 250 myń tekshe metr sý sorylǵanyn habarlaǵan bolatynbyz.

Sondaı-aq, 500 úıge elektr jaryǵy berildi.