Qulsary halqyna úı satyp alýǵa, jóndeýge 70 mlrd teńge aýdarylǵan

ATYRAÝ. KAZINFORM – Atyraý oblysyndaǵy Qulsary qalasynyń turǵyndaryna sý tasqynynan búlingen turǵyn úıin jóndeýge, jańa baspana salyp alýǵa 70 mlrd teńge aýdarylǵan.

Qulsary – Jylyoı aýdanynyń ortalyǵy bolǵanymen, 2001 jyly monoqala mártebesi berilgen. Sáýirde Jem ózeniniń arnasynan asqan tasqyn sý monoshaharǵa kirgen edi.

Sonyń saldarynan turǵyn úı, áleýmettik jáne kásipkerlik nysandar búlindi. 

Atyraý oblysy ákiminiń baspasóz hatshysy Rýslan Jumaǵazıevtiń málimetine súıensek, táýelsiz tehnıkalyq sarapshylardyń qorytyndysymen tasqyn sýdan 2650 úıdiń búlingeni naqtylanǵan. 

«Osy kezge deıin Jylyoı aýdanyndaǵy Qulsary qalasynda tasqyn sýdan baspanasy zardap shekken 2633 turǵyn ótemaqy alý úshin kelisimshartqa qol qoıdy. Olardyń bárine de ótemaqy tólendi. Onyń ishinde táýelsiz tehnıkalyq sarapshylardyń qorytyndysyna sáıkes úıi apatty dep tanylǵan 1453 turǵyn baspana satyp alýǵa ótemaqy aldy. Ótemaqy turǵyndardyń jeke esepshotyna aýdaryldy. Endi olar Atyraý oblysynyń aýmaǵyndaǵy qala men eldi mekenderinen turǵyn úı satyp alýyna múmkindigi bar. Qulsary turǵyndaryna turǵyn úı satyp, ne búlingen baspanasyn qalpyna keltirý úshin jóndeý júrgizý maqsatynda berilgen ótemaqynyń kólemi 70 mlrd teńgeni qurady. Ótemaqy jergilikti bıýdjetten, iri kompanııalar men demeýshilerdiń qarjysy esebinen aýdaryldy», -dep málim etti Rýslan Jumaǵazıev. 

Sondaı-aq, Qulsary qalasynda turatyn 215 kásipker tasqyn sýdan zardap shekken nysandar úshin ótemaqy alýǵa ótinishi bergen.

Búlingen nysandarǵa saraptama júrgizilgennen keıin kásipkerlerge 2,1 mlrd teńge mólsherinde ótemaqy tólengen. 

«Jylyoı aýdanyndaǵy sý tasqyny kezinde turǵyndar ıeligindegi 1082 tórt túlik, 532 úı qusy ólgeni anyqtaldy. Osyǵan baılanysty turǵyndardan ótemaqy alýǵa 150 ótinish tústi. Soǵan sáıkes turǵyndarǵa ólgen mal men qus 212,6 mln teńge ótemaqy tólendi», -dedi Rýslan Jumaǵazıev.

Eske sala ketelik, buǵan deıin Sý basqan Qulsary qalasynda 100 úıdiń qurylysy qalaı júrip jatqanyn jazǵan edik.