Qulsary-Dossor jolynyń sý tasqynynan búlingen bóligi áli jóndelmegen
ATYRAÝ. KAZINFORM – Kóktemde Qulsary qalasynan Maqat aýdanyndaǵy Dossor kentine deıin qatynaıtyn joldyń bir bóligin tasqyn sý basqan edi. Keıin ýaqytsha qalpyna keltirilgenmen, jol bóligine ortasha jóndeý júrgizý áli bastalǵan joq.
«QazAvtoJol» UK» AQ Atyraý oblystyq fılıaly dırektorynyń orynbasary Aslan Dúısenovtiń málimetinshe, Jyl aýdanynyń ortalyǵy – Qulsary qalasy men Maqat aýdanyndaǵy Dossor kentiniń aralyǵyn jalǵaıtyn joldyń búlingen tustary anyqtalǵan.
Sý tasqyny kezinde atalǵan joldyń 101-102 shaqyrymynyń aralyǵyn jyryp ketti. Keıin joldyń 119-121, 122-123, 134-135 shaqyrymdaryndaǵy aralyǵy búlingeni anyqtalǵan.
«Buryn bul joldaǵy 101-102-shaqyrym aralyǵynda sý ótkizetin turba bolmaǵan edi. Tasqyn sý joldyń bul bóligin jyryp ketti. Sodan soń temir turba salynyp, ýaqytsha qalpyna keltirilgen bolatyn. Endi ortasha jóndeý kezinde ýaqytsha salynǵan temir turba alynyp tastalady. Onyń ornyna eki temirbeton turba salynady», -dedi Aslan Dúısenov.
Onyń aıtýynsha, Qulsary qalasy men Dossor kentiniń aralyǵyndaǵy búlingen joldy ortasha jóndeý áli bastalmaǵan. Óıtkeni, jóndeý júrgizetin merdigerdi anyqtaý úshin konkýrs jarııalanǵan.
«Atyraý oblysynda aýa-raıy qarashaǵa deıin jyly bolady. Demek, ortasha jóndeý jumysyn bastaýǵa múmkindik bar. Qarasha aıyna deıin joldyń 101-102-shaqyrymy aralyǵyna ortasha jóndeý júrgizýdi kózdep otyrmyz», -deıdi Aslan Dúısenov.
Atalǵan joldyń 41,8 shaqyrymyna orta jóndeý júrgizý kózdelgen. Ortasha jóndeý kelesi jyly da jalǵasady.
Eske sala ketelik, budan buryn Atyraýda sý tasqynynan búlingen 25,6 shaqyrym jol men 6 kópir jóndelip jatqanyn habarlaǵan bolatynbyz.
