«Qulsary-Atyraý» tas jolyn qalpyna keltirý jumysy bastaldy

ASTANA. KAZINFORM – Qulsary-Atyraý» tas jolyn qalpyna keltirý jumysy bastaldy. Bul týraly Atyraý oblysy ákiminiń baspasóz hatshysy Rýslan Jumaǵazıev aıtty.

«Keıingi birneshe kún Jylyoı aýdany boıynsha oń dınamıka baıqalady. Sý deńgeıi 50 sm-ge jýyq tómendedi. «Qulsary-Atyraý» tas jolyn qalpyna keltirý jumysy bastaldy. Sonymen qatar sý tasqynymen kelgen qoqysty tazalaý jumystary júrgizilip jatyr. Sý sorý jumystary jalǵasýda. Buryn sý basqan ýchaskelerde elektr energııasyn berýdi qalpyna keltirý júrgizilip jatyr. Sý tartylǵan aýdandarda aýdan ákimdikteri azamattardan keltirilgen shyǵynǵa baılanysty ótinish qabyldaýda. Jylyoı aýdanynda 230 polıtsııa qyzmetkeri qaýipsizdikti qamtamasyz etedi», - dedi ol Ortalyq kommýnıkatsııalar qyzmetindegi brıfıngide.

Onyń aıtýynsha, Jaıyq ózeni boıynda jaǵalaýdy nyǵaıtýǵa baǵyttalǵan aýqymdy jumys júrgizilip jatyr. Onyń uzyndyǵy 215 shaqyrymdy quraıdy. 

«Gıdrogeologııalyq derekterge sáıkes, Jaıyq ózeni sýynyń kóterilýi Inderbor aýyly tusynda +15 sm, Mahambet aýylynda +19 sm, Atyraý qalasynda +18 sm-di quraıdy. Ótken 6 kúnniń ishinde josparlanǵan 215 shaqyrym jaǵalaýdy nyǵaıtý dambasynyń 101 shaqyrymy tóseldi. Bul jumysqa 981 tehnıka, túrli uıymdardyń 3 382 jumysshylary jáne shamamen 3,5 myń erikti jumyldyryldy. Dál osyndaı jumys Mahambet aýdanynda da júrgizilip jatyr», - dedi Rýslan Jumaǵazıev.

Buǵan deıin 6 óńirde 4 myńǵa jýyq úı sý astynda qalǵanyn jazǵan edik.