Kúlli álem koronavırýspen kúle júrip kúrese bastady
NUR-SULTAN. QazAqparat – SOVID-19 dúnıeni dúr silkindirdi. Álemdi álekke salǵan keselmen kúres barlyq shepte júrip jatyr.
Álemniń túkpir-túkpirinen úreıli statıstıkalar kelip jatqanymen, keı halyq bul qıyndyqqa moıymaıtynyn erekshe jolmen kórsetip keledi. Máselen koronavırýs qaýpi jaǵynan eń joǵary sanatqa engen Italııadan balkonda án shyrqaǵan azamattardyń vıdeosy tarap ketti.
Sáýleti men dáýleti jarasqan memlekettiń azamattary óz halqyn da, álem elderin de osylaı jigerlendirip jatqandaı. Balkonda án shyrqaý – Italııada búgin de fleshmobqa aınalyp, halyqtyń ózi bastap ketken aktsııaǵa myńdaǵan azamat atsalysýda.
Án demekshi ıtalııalyqtardaı bizdiń eldiń de ónerpazdary da «Koronavırýs ket, ket» dep án shyrqap, kóptiń kóńilin kóterip júr.
Bir qyzyǵy, osy ándi shyrqap bastaǵan elimizge belgili ánshi Marat Omarovtyń bastamasyn ózge juldyzdar da qoldap ketipti. Qaýipti kesel jaıly kóńildi ánniń remıksi de shyǵyp qoıǵan eken.
Ánmen birge bımen de kóptiń kóńilin aýlaǵandar bar. Esterińizde bolsa Qytaıdaǵy qandasymyz - Shyńjańnan Ýhanǵa kómekke barǵan tájirıbeli dáriger-hırýrg Bahargúl Tolqynqyzy koronavırýstan emdelip jatqan naýqastarǵa qazaqtyń «Qara jorǵa» bıin bılep bergen edi. Osy mádenı sharany tamashalaǵan adamdar «Qara jorǵa» bıin tuńǵysh kórgenderin jáne erekshe bıden úlken áser alǵandaryn aıtyp, alǵystaryn bildirgen.
Al Ispanııa astanasy Madrıdte turǵyndar medıtsınalyq qyzmetkerlerge uzaǵynan qol shapalaqtap, úlken qoldaý bildiripti. Balkondarynan shyǵyp, «bravo» dep aıǵaılaǵan halyq aq halatty abzal jandarǵa alǵystaryn osylaı bildiripti.
Koronavırýsqa qatysty ınternette ártúrli memder men ázilder tarap ketken. Mine álem halqy osylaısha bul qıyndyqty da eńserip keledi.
