Qulyndy qutqarmaq bolǵan Túrkistan oblysynyń turǵyny sýdan shyǵa almaı qaldy
TÚRKІSTAN. KAZINFORM — Patrýldik polıtsııa batalonynyń ınspektorlary Dáýlet Saǵynbaev pen Nurǵalı Saparhan jas jigitti ajaldan arashalap qaldy.
Respýblıkalyq mańyzy bar «Saryaǵash-Jetisaı-Jibek Joly» tasjolyna kezekshilikke túsken polıtseılerge jol boıyndaǵy adamdar Syrdarııa ózeninen bir adamnyń shyǵa almaı jatqanyn jetkizgen.
Tártip saqshylary mán-jaıdy bilisimen birden qutqarý jumysyna kiristi.
Dáýlet sýǵa túsip, batyp bara jatqan adamdy jaǵaǵa jaqyndatty.
Sodan áriptesi Nurǵalı ekeýi er adamdy súırep, qaýipsiz jerge alyp shyqty.
«Maqtaaral aýdanynyń turǵyny mal baǵyp júrip, qulynnyń ózenge túsip ketkenin kórgen. Sodan qutqarmaq bolyp sýǵa túsip, shyǵa almaı qalǵan. Qazirgi tańda polıtseılerdiń jyldam áreketi arqasynda aman qalǵan turǵynnyń jaǵdaıy birqalypty» delingen Túrkistan oblysy polıtsııa departamentiniń baspasóz qyzmeti usynǵan aqparatta.
