Kýlınar rólinde - Prezıdent Іs Basqarmasynyń aspazdary balalarǵa sheberlik saǵatyn ótkizdi
Prezıdent Іs basqarmasynyń bilikti kondıterleri men aspazdary balalardy qoldaý ortalyǵynyń tárbıelenýshilerine óz isiniń qyr-syry jáne retseptileri jaıly aıtty.
Máselen, Svetlana Baýjanovanyń 25 jyldyq eńbek ótili bar, onyń ishinde jeti jyl Prezıdent Іs Basqarmasynyń №3 ashanasynda aspaz-brıgadır bolyp jumys isteıdi.
«Biz búgin balalarmen úgilmeli qamyrdan kekster men pechene daıyndadyq. Balalar óte rıza jáne asqan qyzyǵýshylyq tanytty. Balalar óte meıirimdi, búgin jańa nárse úırengisi keletinderin, ne isteı alatyndaryn kórsetti. Balalar kez kelgen jasta tamaq ázirleýge kómektese alady, eń bastysy – olardy qyzyqtyrý qajet. Bala kezinen qyzyǵýshylyqtaryn arttyrsaq, kondıter nemese jaqsy aspaz bolyp ósedi. Muny mysalmen kórsetý kerek. Balalar búgin kez kelgen jumysty ońaı oryndady», - deıdi aspaz.
«Sheberlik saǵaty biz úshin ótkizilip jatyr jáne bul maǵan unaıdy. Men bundaı pecheneni birinshi ret jasap turmyn», - deıdi ortalyqtyń tárbıelenýshisi Maksım.
Balalar qýanyshyn jasyra almaı PІB aspazdarynan ózderine taǵy da qonaqqa kelýin surady.
Sheberlik saǵatynda balalar óz qolymen keks, pechene ázirlep kórdi. Al dastarhan basyna jaıǵasqanda ózderi ázirlegen astan dám tatty.
Balalardy qoldaý ortalyǵynyń dırektory Bıbigúl Takısova balaǵa ata-anasyz ońaı soqpaıtynyn, sondyqtan bundaı sharalar olarǵa zor qýanysh sylaıtynyn atap ótti.
Astanada qıyn jaǵdaıǵa tap bolǵan balalardy qoldaıtyn jalǵyz ortalyq bar. Bul mekeme 2019 jyly kámeletke tolmaǵandardy beıimdeý ortalyǵy men balalar úıin biriktirý jolymen qurylǵan.
Qazir munda jetim balalardy, ata-anasynyń qamqorlyǵynsyz qalǵan balalardy qosa alǵanda 60 bala tárbıelenip jatyr.
«Bizdiń ortalyqta balalar turaqty jáne ýaqytsha toptarǵa bólinedi. Ázirge 28 bala osy ortalyqty turaqty mekendeıdi, ıaǵnı olardyń ata-anasynyń quqyǵy shekteýli nemese múldem ata-ana quqyǵynan aıyrylǵan. Al ýaqytsha topta 32 bala bar, olar – qaraýsyz qalǵan nemese ómirlik qıyn jaǵdaıǵa tap bolǵan balalar. Olardyń taǵdyry sheshilip jatqanda bizdiń ortalyqta bolady. Munda 3 jastan 18 jasqa deıingi balalar qabyldanady. Memleket balalardy tolyq qamtamasyz etedi. Bes rettik tamaq, barlyq normalar boıynsha kıim beriledi», - deıdi ortalyq dırektory Bıbigúl Takısova.
QR Prezıdenti Іs Basqarmasy bul sharany Prezıdentimiz 2022 jyldy «Balalar jyly» dep jarııalanýyna oraı ótkizip otyr.
«Máselen jazda múgedektigi bar balalardy Býrabaıdaǵy emdeý-saýyqtyrý ortalyǵyna alyp bardyq jáne «Aljır» memorıaldy keshenine shaqyrdyq. Jyl basynan beri kópbalaly otbasylarǵa materıaldyq-áleýmettik kómek kórsettik. Búgin Astanadaǵy balalardy qoldaý ortalyǵyna kelip, arnaıy syılyqtarymyzdy tabystaımyz, aspazdarymyz sheberlik saǵatyn ótkizip, merekelik dastarhan jaıady. Áli de jyl sońyna deıin balalarǵa qatysty birneshe shara josparlap otyrmyz», - dedi QR Prezıdentiniń Іs Basqarmasy uıymdastyrý-baqylaý bólimi meńgerýshisiniń orynbasary Gúlnar Chıkınaeva tilshilerge bergen suhbatynda.
«Bizge volonterler men tálimgerler jıi keledi. Eriktiler balalarmen sabaq ótkizip, kınoteatrlarǵa, kontsertterge aparady. Balalar árdaıym qonaqtardy asyǵa kútedi jáne qonaqtarmen birte-birte dos bolyp ketedi», - dedi B.Takısova.
