Qulybaev qory Jańaózende halyqaralyq deńgeıdegi sport kesheniniń qurylysyn bastady
AQTAÝ. KAZINFORM – Mańǵystaý oblysy Jańaózen qalasynda halyqaralyq standarttarǵa saı keletin zamanaýı sport-saýyqtyrý kesheniniń qurylysy bastaldy. Jobanyń bastamashysy eldegi iri qaıyrymdylyq uıymdarynyń biri – Tımýr Qulybaev jetekshilik etetin Halyk qory, dep habarlaıdy Kazinform agenttigi.
Sporttyq keshen 3,87 gektar aýmaqta salynyp jatyr. Josparǵa sáıkes, nysan 9 aı ishinde paıdalanýǵa beriledi. Jalpy quny – 1,5 mlrd teńge. Keshen quramyna ámbebap sport zaldary, kıim aýystyratyn bólmeler, dýsh kabınalary, sport jabdyqtaryn saqtaıtyn qoımalar, ákimshilik jáne tehnıkalyq bólmeler kiredi. Sondaı-aq beınebaqylaý jáne órt qaýipsizdigi júıeleri qarastyrylǵan. Joba halyqtyń dene shynyqtyrýmen jappaı aınalysýyna qolaıly jaǵdaı jasaýǵa baǵyttalǵan.
Qurylys Memleket basshysy Qasym-Jomart Toqaevtyń Qazaqstan halqyna Joldaýynda bergen tapsyrmasy aıasynda júzege asyrylyp jatyr.
– Basymdyqty buqaralyq sport pen dene tárbıesine, ásirese balalarǵa berý qajet. Ár oblys pen iri aýdan ortalyqtarynda sport sektsııalary ashylýy tıis, - degen edi Prezıdent.
Jańaózen sııaqty halqy tyǵyz ornalasqan qalada mundaı sporttyq ortalyqtyń salynýy óte ózekti ári qajetti bastama. Keshende balalar men jasóspirimderge arnalǵan tegin úıirmeler men sektsııalar ashylyp, kásibı sportshylar úshin jattyǵý bazasy qurylady. Sonymen qatar túrli deńgeıdegi sport jarystaryn ótkizýge múmkindik bolady. Joba aıasynda jańa jumys oryndary ashylyp, jastardyń belsendi demalysy úshin ınfraqurylym qalyptasady.
– Jastar men qala turǵyndary úshin osyndaı zamanaýı sport-saýyqtyrý kesheniniń qurylysyna qoldaý bildirgeni úshin Halyk qoryna shynaıy alǵysymyzdy bildiremiz. Bul nysan tek qalanyń áleýmettik ınfraqurylymyn nyǵaıtyp qoımaı, salamatty ómir saltyn nasıhattaýǵa jáne óskeleń urpaqtyń sportqa degen qyzyǵýshylyǵyn arttyrýǵa qýatty serpin beretinine senimdimiz. Biz árdaıym jastardyń jarqyn bolashaǵy úshin jaǵdaı jasaýǵa daıynbyz, - dedi Jańaózen qalasynyń ákimi Janseıit Qaınarbaev.
Al Halyk qorynyń dırektory Saǵynbek Shúnkeevtiń aıtýynsha, aımaqtardyń ornyqty damýyn qoldaý – qor jumysynyń basym baǵyty.
– Biz jastarǵa baǵyttalǵan jobalarǵa erekshe kóńil bólemiz. Sebebi jastar – Qazaqstannyń bolashaǵynyń tiregi. Sport-saýyqtyrý kesheniniń qurylysy qoǵam densaýlyǵyn nyǵaıtýǵa jáne áleýmettik ál-aýqatty arttyrýǵa baǵyttalǵan strategııalyq joba, - dedi ol.
Aıta keteıik, 2023 jyldan beri Qulybaev qory Mańǵystaý oblysyn damytýǵa 5 mlrd teńgege jýyq qarjy bólgen. Bul qarajat áleýmettik mańyzy bar bastamalarǵa, turǵyndardyń ómir sapasyn jaqsartýǵa baǵyttalǵan ınfraqurylym jobalaryna jumsalyp jatyr.
Qor júzege asyrǵan mańyzdy bastamalar qatarynda:
– Beıneýdegi astyq termınalyn qaıta jandandyrý – óńirdiń azyq-túlik qaýipsizdigi úshin strategııalyq mańyzdy joba;
– Aqshuqyr men S.Shapaǵatov aýyldarynda ornatylǵan tuşylandyrý qondyrǵylary – 25 myńnan astam adamdy taza aýyzsýmen qamtamasyz etti;
– Jańaózende salynǵan balalar jáne fýtbol alańdary – jastardyń belsendi demalysyna arnalǵan jańa keńistikter qalyptastyrdy.
Qor ókilderiniń aıtýynsha, Jańaózende boı kóterip jatqan sport kesheni jaı ǵana ǵımarat emes. Bolashaqta jas urpaqtyń erik-jigerin, tártibin qalyptastyryp, paıdaly daǵdylardy meńgerýge yqpal etetin ortaǵa aınalmaq. Bul – saýatty, belsendi ult qalyptastyrý jolyndaǵy naqty qadam.