Kúlekeev elimizdegi ózgerister týrasynda: orta bıznestiń damýyna jaǵdaı jasaldy
ASTANA. KAZINFORM – Shaǵyn jáne orta bıznestiń damýyna ońtaıly jaǵdaı jasaldy. Bul týraly VIII saılanǵan QR Parlamenti Májilisiniń janyndaǵy qoǵamdyq palatanyń múshesi, ekonomıst Jaqsybek Kúlekeev málim etti.
- Elimizde tolyqqandy saıası reforma Qazaqstan Prezıdenti Qasym-Jomart Toqaevtyń 2022 jyly 16 naýryzda halyqqa Joldaýynan bastaldy. Osy Joldaýynda Memleket basshysy eldiń saıası damýynyń jańa modelin usyndy. Tosyn oıǵa toly Joldaýynda Prezıdent aldymen bıliktiń bir ǵana qolǵa shoǵyrlanýyn shekteý baǵytyndaǵy ózgeristerge erekshe mán berdi. Sodan soń, bılik pen qoǵam arasyndaǵy senim men bilikti nyǵaıtýdy negizdegen birneshe tyń usynysty jarııalady. Ol usynystar konstıtýtsııalyq reformaǵa ulasqany ári ol reformanyń qoǵamnyń túbegeıli jańǵyrýǵa degen tereń suranysynan týyndaǵany jaıly atap ótken jón, - dedi J.Kúlekeev Parlament Májilisinde Prezıdent Qasym-Jomart Toqaevtyń saıası reformalaryn iske asyrý taqyrybyn talqylaý kezinde.
Onyń aıtýynsha, eń úlken ózgeris retinde jeke monopolısterdiń ústemdigin shekteı otyryp, ádil naryqtyq básekelestiktiń damýyna jol ashýǵa baǵyttalǵan saıası-ekonomıkalyq sheshimderdi atap ótýge bolady. Kezinde zańsyz jekeshelendirilgen biraz aktıv qaıtarylyp, shaǵyn jáne orta bıznestiń damýyna ońtaıly jaǵdaı jasaldy. Sonyń nátıjesinde shaǵyn jáne orta bıznestiń jalpy ishki ónimdegi úlesi 37 paıyzdan asyp, olardyń el ekonomıkasyna ınvestıtsııa salýy arta tústi.
- Qazirgi kezde el ekonomıkasyna tartylyp jatqan ınvestıtsııanyń jartysynan astamy osy shaǵyn jáne orta bıznestiń úlesine tıesili. Atalǵan saıası reformalar keıingi jyldary ekonomıkanyń turaqty damýyna yqpal etip otyr. Bul rette, jalpy ishki ónim byltyrdyń qorytyndysy boıynsha 288 mlrd dollarǵa jetip, jan basyna shaqqanda 14 myń dollardan asty. Sheteldik ınvestorlar óńdeý óndirisine molynan ınvestıtsııa tarta bastady. Sonyń nátıjesinde elimizde jańa óndiris salalary paıda bolyp, óńdeý salasy qarqyndy damyp keledi, - dedi ekonomıst.
Budan buryn habarlanǵandaı, búgin Parlament Májilisiniń jalpy otyrysynda palata tóraǵasy Erlan Qoshanov «Prezıdent Qasym-Jomart Toqaevtyń saıası reformalaryn iske asyrý – memlekettik qurylystyń jańa tarıhı kezeńi» atty baıandama jasady.