Kúlekbaevtyń isi boıynsha 40 sot-medıtsınalyq saraptama júrgizildi

ASTANA. QazAqparat - Rýslan Kúlekbaevtyń isi boıynsha 40 sot-medıtsınalyq saraptama júrgizildi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR Ádilet mınıstrligi Sot medıtsınasy ortalyǵy dırektorynyń orynbasary Rýslan Satybaldıev málim etti, dep habarlaıdy QazAqparat.

«Sot medıtsınasy ortalyǵynda saraptama sanynyń kúrt artýy 5 maýsymda Aqtóbede jáne Almatyda oryn alǵan sońǵy oqıǵalarmen baılanysty. Osy eki rezonansty isterge qatysty óte kóp saraptama júrgizilgen. Aqtóbe isi boıynsha 240-tan astam sot-medıtsınalyq saraptama júrgizilse, Almatydaǵy Kúlekbaev isi boıynsha 40 sot-medıtsınalyq saraptamasy ótkizildi», - dep atap ótti ortalyq ókili.

Eske sala ketsek, buryn Sot medıtsınasy ortalyǵy QR Densaýlyq saqtaý jáne áleýmettik damý mınıstrliginiń qaramaǵynda bolǵan, biraq 2015 jyldyń 1 qańtarynan bastap, QR Ádilet mınıstrligine berildi.

Jalpy ortalyqta 2016 jyldyń 9 aıynda 145 686 saraptama ótkizilgen. Saraptamalardyń úlesinde áskerı polıtsııa men QR UQK organdarynyń ótkizetin saraptamasy ulǵaıǵan. Bul óz kezeginde elde oryn alǵan iri oqıǵalarǵa baılanysty bolyp otyr, dep habarlaıdy Ádilet mınıstrligi.

Bunyń aldynda habarlaǵanymyzdaı, Almatyda 10 adamdy óltirip, qandy qyrǵyn jasaǵan Rýslan Kúlekbaev 2 qarashada ólim jazasyna kesildi. Degenmen bizdiń elde ólim jazasyna moratorıı jarııalanǵandyqtan, Kúlekbaev óz jazasyn túrmede kútetin bolady.