Quldyraýdyń túbine jettik, endi tek joǵary kóterilemiz - QR Shańǵymen tuǵyrdan sekirý jáne shańǵy qossaıysy federatsııasynyń prezıdenti
ALMATY. QazAqparat - Biz quldyraýdyń túbine jettik dep oılaımyn. Endi tek joǵary kóterilemiz. Almatyda shańǵymen tuǵyrdan sekirýden ótken Álem Kýbogynyń eki kúndik qysqy kezeńiniń jarystary aıaqtalǵan soń, jýrnalıstermen bolǵan kezdesýde QR Shańǵymen tuǵyrdan sekirý jáne shańǵy qossaıysy federatsııasynyń prezıdenti Andreı Verveıkın osylaı dedi.
Esterińizge sala ketelik, Halyqaralyq shańǵy sporty federatsııasy (FIS) Álem Kýbogy qysqy kezeńiniń eki kúndik jarystary 27-28 aqpanda Almatydaǵy Halyqaralyq «Suńqar» shańǵy tuǵyrlary kesheninde ótken bolatyn.
Qazaqstannyń atynan aǵaıyndy Marat pen Radık Japparovtar, Konstantın Sokolenko jáne Sabyrjan Momynov óner kórsetken edi. Al áıelder arasyndaǵy jarystarǵa ázirge qyzdarymyz qatysqan joq.
Alǵashqy kúngi básekede Marat Japparov 40-shy oryndy ıelense, ekinshi kúngi aqtyq synda Sabyrjan Momynov 50-shi orynǵa aıaq tiredi. Qalǵandary irikteýden óte almady.
«Marat Japparovtyń 40-shy oryn alǵanyn jetistik deýge bolady. Óıtkeni, ol buǵan deıingi kezeńderde mundaı nátıje kórsete alǵan joq edi. Al Radık Japparov Álem Kýbogynyń Nıjnıı Tagıl qalasynda ótken kezekti kezeńinde 31-shi oryndy ıelendi. Alǵashqy otyzdyqqa ilinýge bir-aq upaıy jetpeı qaldy. Onyń ústine maýsym da kúrdeli boldy. Biz quldyraýdyń túbine jettik dep oılaımyn. Endi tek joǵary kóterilemiz», - dedi A. Verveıkın.
Ol sonymen qatar, 2017 jyly Almatyda ótetin qysqy Ýnıversıadaǵa shańǵymen tuǵyrdan sekirýden Qazaqstan qurama komandasy jańartylǵan quramda óner kórsetetindigin aıtty.
«Qazir bizde rezerv bar. 16 jastaǵy sportshylarymyz sheberlikterin shyńdap jatyr. Olar aldyńǵy qatarly sportshylarymyzdyń deńgeıine jaqyndap qaldy. Al Ýnıversıadaǵa qaraı komanda múldem jańartylady. Árıne, sonda laıyqty óner kórsetýge tyrysamyz», - dedi A. Verveıkın.
