«Quldyqta boldym»: Aqmolalyq polıtseıler vıdeoǵa qatysty tergeýdi bastady

KÓKShETAÝ. QazAqparat – Aqmola oblysy Aqkól qalasynyń turǵyny ózin bireýler quldyqta ustaǵany týraly áleýmettik jelide vıdeo taratyp, kómek surady. Polıtsııa osyǵan baılanysty sotqa deıingi tergeýdi bastady, dep habarlaıdy QazAqparat tilshisi.

«Aqmola oblysynyń Polıtsııa departamenti azamat A.-nyń ótinishi boıynsha sotqa deıingi tergeý bastalǵanyn habarlaıdy. Dene jaraqattary boıynsha Astana qalalyq sot saraptamasy ınstıtýtynda sot-medıtsınalyq saraptama taǵaıyndaldy», - dedi vedomstvodan QazAqparat tilshisiniń saýalyna.

Sonymen birge PD baspasóz qyzmetinen atap ótkendeı, tergeý sheńberinde kýágerler anyqtalyp, jábirlenýshiniń jáne ol kórsetken adamdardyń aıǵaqtary muqııat tekserilip jatyr.

Qylmystyq isti tergeý barysyn Polıtsııa departamentiniń bastyǵy óz baqylaýyna aldy.