«Kúldir-búldir» jobasynyń ekinshi maýsymy bastaldy

- Ǵalym aǵa, ulyńyzdyń televızııa salasyndaǵy alǵashqy qadamy qutty bolsyn! «Kúldir-búldirdiń» mundaı tabysty baǵdarlama bolýynyń syry nede? Negizgi ıdeıasy qandaı?

- Bul jobanyń negizgi ıdeıasy - bala tárbıesindegi ákeniń rólin aıshyqtaý. Qazirgi tańda kóptegen ákelerdiń balaǵa ýaqyty bolmaı jatady nemese jumystan sharshap kelip, olarmen sóılesýge murshasy jetpeıdi. Tirshiliktiń qamy ǵoı. Bir jaǵynan qarasań, jumys eshqashan bitpeıdi. Al balań kún sanap ósedi. Onyń táı-táı basqanyn, eń alǵash sóılegenin, aınalasyn tanýdaǵy áserin, tátti qylyqtaryn, minez-qulqyndaǵy ózgeristerdi nazardan tys qaldyrmańdar degen joba bul. Sıýjet kúlkili oqıǵalardan quralǵanymen, ár serııanyń aıtar taǵylymy mol. Mysaly, qartqa kúlme, kisiniń zatyn ruqsatsyz alma, bala aldynda baıyppen sóıle, ótirik aıtpa, óz tarıhyńdy bil, kórshińdi qurmette, dosyńdy syıla degen tárbıelik máni  bar. Eń bastysy, osyndaı mol tálim-taǵylymdy bala teledıdar aldynda, esh qıyndyqsyz sanasyna sińire beredi.  

- Іrikteýden qalaı óttińizder? Áke men balanyń rólge birden qabyldanýy sırek kezdesetin oqıǵa.

- Negizi, bul jobaǵa deıin de Rasýldyń shaǵyn vıdeoblogyn júrgizetinmin. Sol arqyly Instagram jelisinde tanyla bastadyq. «Balapan» arnasynyń ujymy sol vıdeoblogty baqylap júripti. Olar áke men balanyń qarym-qatynasy týraly otbasylyq joba túsirýdi josparlap otyr eken. «Іzdegenge - suraǵan» degendeı, oıymyz bir jerden shyqty. Qazirgi tańda «Kúldir-búldir» «Balapan» arnasynyń eń reıtıngi joǵary, kórermenderdiń suranysyna ıe, úzdik jobasyna aınaldy.

- Jaýyr bolǵan bir suraq, túsirilim barysynda qandaı qyzyqtar boldy?

- Túsirilimniń qyzyǵy da, qıyndyǵy da qatar júrdi. Keıde Rasýlmen jumys isteý qıynǵa soǵady, erkeleıdi, qyrsyǵady. Tórt jasar balany sóıletý, kóńilin tabý da ońaı emes. Bir qyzyq oqıǵa esimde qalypty, stsenarıı boıynsha Rasýl ydys syndyryp alady, al men oǵan renjińkirep sóıleýim kerek. Ydysty operator syndyryp, jerge shashyp tastady. Rasýlǵa sóıleıtin sózderin úırettik. «Kamera, motor!». «Rasýl, ydysty nege syndyrasyń, baıqamaısyn ba?» degenimde Rasýl operatordy kórsetip, «Men emes! Ana jigit qoı syndyryp tastaǵan! Nege menen kóresiń?» dep renjigeni bar. Bul túsirilimniń eń alǵashqy kúni edi, Rasýl túsirilimniń qyr-syryn tolyq túsinbegen. Munyń  bári stsenarıı ekenin, oıyn ekenin Rasýlǵa bir saǵat túsindirip, ashýyn áreń bastyq.

- Áleýmettik jelilerde «Kúldir-búldir» týraly birqatar syn da aıtylyp júr.

- Bitken iske synshylar tabylady, olardyń bolǵany da durys. Kópshiligi «jumyssyz ákege» tıisedi. Biraq ol jumyssyz emes qoı. Negizgi ıdeıadan aýytqymaý úshin, balany únemi ákesiniń qasynda qaldyramyz. Baǵdarlamany úzbeı kórip júrgen kórermender birden túsinedi. Onda men asaba, akter, kontsert júrgizýshisimin, shyǵarmashylyqpen aınalysamyn. ıAǵnı, qatyp qalǵan jumys kestem bolmasa da, tabys tabamyn, otbasymdy asyraımyn. Otanasy óziniń súıikti isimen aınalysady. Degenmen, syn men minge qaraǵanda, jaǵymdy pikirler kóbirek aıtylyp jatqandaı kórinedi. Ótkende maǵan bir áıel habarlasyp: «Meniń balalarym seniń Rasýlǵa nandy bir qolmen úzbe, eki qolyńmen úzip jeý kerek degenińdi estip, bir-birine aıtyp júrdi. Keıinirek baıqasam, nandy eki qolmen úzip jeıtin boldy», deıdi. Ras, balaǵa aqyl aıtýdyń da túrli tásilerdi bar. Dál osy «Kúldir-búldirdiń» tańdap alǵan tásili óte tıimdi dep oılaımyn. Jeńil, kóz aldyńda túrli sıtýatsııalyq oqıǵalarmen túsindirip beredi. Eń bastysy, balalarǵa ózi quralpy balany kórý qyzyq. Rasýldyń da erkeligi, keıbir tentektigi oıdan shyǵarylǵan joq, ol árbir 4-5 jasar balanyń minez-qulqynda, psıhologııasynda bar, ıaǵnı ómirden alynǵan shynaıy kórinis deýge bolady.

- «Kúldir-búldirdiń» ekinshi maýsymy kórermenderge qandaı jańalyq usynady?

- Ekinshi maýsymda ózgerister óte kóp. Munda barlyq otbasy múshelerin qamtyp, úlken bir áýlettiń tynys-tirshiligin kórsetemiz. ıAǵnı, jobanyń ortasynda Rasýldyń ata-ájesi keledi. «Atasynyń balasy», «Ájesiniń balasy» degen uǵymdardy qaıtadan jańǵyrtý kerek dep esepteımiz. Ókinishke qaraı, qazir qarttar úıin panalap júrgen qarııalar kóp. Osynyń bári áke men bala, ata men nemere arasyndaǵy meıirimniń bolmaýynan týyndap otyrǵan joq pa?  Mysaly, Rasýldyń atasymen oınap, arqasyna minip, erkelep júrgenin kórgen balalar sózsiz qyzyǵar edi. Bir sózben aıtqanda, otbasy qundylyqtaryn nasıhattaǵymyz keledi.

- Instagram jelisinde Rasýldyń jeke paraqshasyn qarap shyqtym. 189 myń (!) oqyrmany bar. Mundaı tanymaldylyq Rasýldyń minez-qulqyna, júris-turysyna qalaı áser etip jatyr?

- Tanymaldylyqtyń ne ekenin Rasýl áli túsinbeı júr, minez-qulqyna áser etti deýge áli tym jas sekildi. Biraq, el nazarynda bolyp úırenip qalǵan, Rasýl úshin bul qalypty jaǵdaı sekildi.

- Kóz tıedi dep qoryqpaısyz ba?

- Qorqamyn, árıne. Ýaıymdaımyn. Biraq, ol jóninde kóp oılaǵym kelmeıdi. Keıde anasy ekeýmiz óz balamyzǵa túkirip qoıamyz. 

- Rasýldyń túrli qyzyqty vıdeolary az ýaqytta-aq áleýmettik jelilerdi sharlap ketedi. Olardy túsirýge arnaıy daıyndalasyzdar ma, álde kezdeısoq túsirilgen jazbalar ma?

- Barlyǵy esh boıamasyz, shyn oqıǵalarǵa negizdelgen. Rasýl óziniń sóz tapqyshtyǵymen, aıtqyshtyǵymen qyzyq. Sondaı qyzyqty sátterdi túsirip úlgerseń - úlgerdiń, úlgermesen ketti. Meniń oıymsha, 24 saǵat boıy Rasýldy kameraǵa túsirip júrse, sonyń ózi qyzyqty bir joba bolar edi. Túsirilim barysyndaǵy qyzyqtardy da paraqshaǵa júktep qoıdym.

- Umytpasam, úsh uldyń ákesisiz. Ul tárbıesinde ne nársege mán bergen jón?

- Ózim erte áke atańdym. Erte áke bolsań, balańmen birge eseıesiń dep jatady, men Rasýlmen jigittershe sóılesemin. Sodan bolýy kerek, Rasýl keıde úlken adamdarsha áńgime aıtady. Ekinshi ulym Rasýlǵa qaraǵanda uıańdaý, kenjem áli kishkentaı. Árıne, qajet kezde erkeletemin, tyıatyn kezde, tyıyp otyramyn. Otbasyma kóp kóńil bólýge tyrysamyn jáne qansha sharshap tursam da balanyń erkeligin kóteremin.

- Suhbatyńyz úshin kóp rahmet! Sáttilik tileımin!