Quldyqqa túsken balalar: Jambyl oblysynda arnaıy jumys toby quryldy

ASTANA. KAZINFORM — Jambyl oblysy Talas aýdanynda kámeletke tolmaǵan balalar vıdeoúndeý jazyp, ózderin májbúrli jumysqa jekkenin, qorlyq kórip, soqqyǵa jyǵylǵandaryn aıtqan. 

Vıdeo áleýmettik jelide jarııalanǵannan keıin quzyrly organdar dereý áreket etip, jasóspirimderdi qaýipti ortadan jedel arada alyp shyqty. Búgin atalǵan másele boıynsha Jambyl oblysynyń ákimi Erbol Qarashókeevtiń tapsyrmasymen arnaıy jumys toby qurylǵany belgili boldy.

— Oblys ákiminiń orynbasary jetekshilik etetin jumys toby máseleni tolyq anyqtaý, balalardyń qaýipsizdigin qamtamasyz etý jáne quqyqtaryn qorǵaý boıynsha zerdeleý jáne tekserý jumystaryn júrgizetin bolady. Zerdeleý nátıjesine sáıkes qosymsha aqparat joldanady. Qazirgi tańda tıisti quzyrly organdarmen birlesip jasóspirimderdiń qaýipsizdigin qamtamasyz etý boıynsha naqty sharalar qolǵa alyndy. Kóterilgen máselege sáıkes osy sekildi keleńsiz jaǵdaılardyń aldyn alý maqsatynda aldaǵy ýaqytta óńirdegi ózge de bilim mekemeleri jan-jaqty zerdelenedi, — dep atap ótti ákimdiktiń baspasóz qyzmeti.

Buǵan deıin balalardy júıeli túrde uryp-soqqan kúdiktiniń qamaýǵa alynǵany habarlandy. Іstiń tergelýi Іshki ister mınıstri E. Sadenovtiń jeke baqylaýynda ekeni de aıtyldy. Qazir balalarǵa medıtsınalyq jáne psıhologııalyq kómek kórsetilip jatyr.