Quldyqqa tap boldy: jyl basynan Mıanma men Laostan 12 otandasymyz shyǵaryldy

ASTANA. KAZINFORM – QR Syrtqy ister mınıstrligi quldyqqa tap bolǵandardy qutqarý is-sharalaryna qatysty túsinik berdi.

- Qazaqstan Respýblıkasynyń Syrtqy ister mınıstrligi óz quzyreti sheginde shetelde júrgen Qazaqstan azamattarynyń quqyqtary men zańdy múddelerin qorǵaý máselelerine erekshe basymdyq beredi jáne bul baǵytta júıeli jumys júrgizedi. Shetelde eńbek quldyǵynda júrgen azamattardyń sany belgisiz, degenmen osyndaı jaǵdaıǵa tap bolǵan qazaqstandyqtar anyqtalǵan jaǵdaıda, olarǵa qajet konsýldyq-quqyqtyq kómek kórsetiledi, - dep atalyp ótken mınıstrliktiń Kazinform agenttigine bergen jaýabynda.

Negizinen, azamattar áleýmettik jeliler men messendjerler arqyly joǵary jalaqy ýáde etilgen jumys usynystaryna senip, kóbinese Ońtústik jáne Ońtústik Shyǵys Azııanyń keıbir eline baratyny málim.

- Jalpy, QR Syrtqy ister mınıstrligi shetelge shyǵatyn azamattarǵa tek resmı arnalar arqyly jumysqa ornalasýdy, deldaldardyń lıtsenzııalaryn muqııat tekserýdi, eńbek sharty men jumys vızasyn aldyn ala rásimdeýdi jáne shetel memlekettegi Qazaqstan elshiliginiń baılanys derekterin ózimen birge alyp júrýge keńes beredi. Qaýipsizdik sharalaryn saqtaý – azamattardyń óz ómiri men quqyqtaryn qorǵaýdyń kepili bolatynyn atap ótken jón, - delingen mınıstrlik aqparatynda.

Vedomstvo málimetine qaraǵanda, jyl basynan beri Qazaqstannyń Syrtqy ister mınıstrligi men Taılandtaǵy QR Elshiligi atqarǵan sharalar nátıjesinde, Mıanma men Laos aýmaǵynan jumys berýshiler tarapynan alaıaqtyqqa tap bolǵan 12 otandasymyz shyǵaryldy. Jalpy, keıingi jyldary 50-ge jýyq Qazaqstan azamaty osy elderden aman-esen elge qaıtaryldy.

Buǵan deıin quldyqqa tap bolǵandarǵa memleket qandaı kómek beretini jaıynda jazǵan edik.

Eske salsaq, Mıanmada qylmystyq toptardyń qolyna túsken qazaqstandyqtar qutqaryldy.