Quldardy bosatý týraly asa sırek tarıhı qujattyń kóshirmesi 2,1 mln. dollarǵa satyldy - Nıý-Iork
ASTANA. 28 maýsym. QazAqparat - AQSh-tyń 16-shy prezıdenti Avraam Lınkoln qol qoıǵan Quldardy bosatý týraly proklamatsııanyń saqtalyp qalǵan kóshirmeleriniń biri Nıý-Iorktegi bássaýdada 2,1 mıllıon dollarǵa satyldy.
Newsru.com habarlaǵandaı,asa sırek tarıhı qujat Manhettenniń galereıalarynyń birinde bássaýdaǵa qoıýdy jón kórgen jeke tulǵaǵa tıesili bolǵan. Asa qundy dúnıeniń jańa ıesi - álemdegi eń iri ınvestıtsııalyq qorlardyń biri Carlyle Group-tiń basqarýshy dırektory Devıd Rýbınshteın.
Aıta keteıik, qujattyń osy kóshirmesiniń baǵasy eń joǵary kórsetkish emes, sebebi ótken joly eki jyl buryn satylǵan proklamatsııa kóshirmesi bássaýdada 3,8 mıllıon dollarǵa ketken edi.
Ótken joly satylǵan lot bássaýdaǵa marqum bolǵan senator Robert Kennedı men onyń áıeli Etelge tıesili jeke toptamadan alynyp qoıylǵan bolatyn.
Eske sala keteıik, Avraam Lınkoln 1862 jyldyń 19 maýsymynda quldyqty joıý týraly zań qabyldap, 1863 jyldyń 1 qańtarynda soltústiktegi jer ıeleriniń menshigindegi quldardy bosatýǵa shaqyryp, Quldardy bosatý týraly proklamatsııa shyǵarǵan.
Degenmen qujat AQSh-taǵy Azamattyq soǵys aıaqtalǵanǵa deıin tıisti kúshine ene almady, sebebi Soltústik pen Ońtústik arasyndaǵy qarýly qaqtyǵystyń saldarynan onyń konstıtýtsııalyq kúshine baılanysty talas týyndady.
Jalpy alǵanda, Avraam Lınkoln proklamatsııanyń 48 kóshirmesine qol qoıǵan, onyń jartysynan azy ǵana saqtalyp qalǵan, dep jazady Eýrazııa birinshi arnasy.
