«Qulaıtyn emes, ushatyn tikushaqtar alýǵa ne kedergi?» - respýblıkalyq basylymdarǵa sholý

***

«Qostanaıdyń qaq ortasynda turǵan Ybyraı Altynsarınniń eskertkishi aıaqasty izim-qaıym joq boldy. Sóıtsek, qazaq dalasyn bilim nárimen sýsyndatqan «Álippeniń atasy» 40 jyl boıy «bóten jerde» turyp kelipti. Ol negizgi ataqonysyn endi tappaqshy», dep jazady «Aıqyn» gazeti «Altynsarın «jer aýdaryldy» atty maqalasynda. Basylymnyń málimetinshe, eskertkish aǵartýshynyń esimi berilgen kóshe boıynda ornalasqan Y.Altynsarın atyndaǵy daryndy balalarǵa arnalǵan mektep-ınternattyń aldyna qoıylmaq.

«Aıqyn» gazetinde «Tarbaǵataıdaǵy tasqyn» degen taqyryppen jaryq kórgen maqalada Tótenshe jaǵdaılar mınıstri bastaǵan arnaıy top sý tasqynyna urynǵan Tarbaǵataı, Zaısan aýdandarynda bolǵandyǵy jazylǵan. Basylymnyń keltirgen derekterine qaraǵanda, qazirdiń ózinde Tarbaǵataı aýdany boıynsha 5 eldi mekendi qyzyl sý alyp ketken. Tasqyn saldarynan 650 úı, 748 qora-jaı, 50 mal qystaǵy sý astynda qalyp otyr. 423 turǵyn úı, 465 qora-jaı, 24 mal qystaǵy búlinip, qulaǵan. Sondaı-aq 1800 iri qara, 9200 qoı men eshki, 513 jylqy ólgen.

Osy jaıtty keńinen tarqata jazǵan maqala «Egemen Qazaqstan» gazetinde de jaryq kórdi. «Oblysta 83 sý qoımasy bar. Buqtyrma, Óskemen, Shúlbi, Kishi Úlbi gıdrostansalary qatań kú­zette. Buqtyrma men Óskemen GES-iniń sý mólsheri turaqty azaıtylyp turady. Óskemenniń joǵary ja­ǵyn­daǵy Kishi Úlbi jasandy sý qoı­ma­synyń qaýpi seıiler emes. Munda 60-80 mıllıon tekshe metr sý jı­nalyp qalǵan. Sý qoımasyn osy­dan 75 jyl buryn jer aýda­ryl­ǵan­dar kádimgi tas, qıyrshyqtas, qum­men bekitip salǵan. 75 jylda kúr­deli jóndeý júrgizilmegen sý qoı­masy apatqa ushyrasa, Óskemenniń ózegi taryla túsedi. Endeshe, sý qoımasyna nazar aýdaratyn kez keldi. 38 orta, shaǵyn sý bógen­de­rin, 36 kólshik jáne onnan astam kanaldardy da qamqorlyqqa alsaq, utylmaımyz. Ertis, Buqtyrma, Uba ózenderi jáne 600-den astam kishi ózen­der 7109 nysanǵa jáne 100 myń­nan astam adamǵa qaýip tóndirip tur», dep jazady basylym.

«Aıqyn» gazetiniń dástúrli «Aq sóıle!» aıdarynyń búgingi qonaǵy - ekonomıka ǵylymynyń kandıdaty, QazUTÝ Ekonomıka jáne bıznes ınstıtýtynyń dırektory Serik Maqysh. «Ǵylymsyz eshqandaı ındýstrııalandyrý alǵa baspaıdy» degen taqyryppen berilgen suhbattyń tolyq nusqasyn oqyǵyńyz kelse, basylymnyń juma kúngi nómirine nazar salyńyz. Ekeýara áńgime barysynda ǵalym «qudaıǵa shúkir, 50 el emes, Úlken jıyrmalyqtyń qataryna kirý josparyn daıyndasa da buǵan Qazaqstannyń ınvestıtsııalyq, ekonomıkalyq, óndiristik áleýeti tolyq jetedi. Bizde tek ǵylymı áleýet jetispeı tur», dep óz pikirin bildirgen.

***

«Qulaıtyn emes, ushatyn tikushaqtar alýǵa ne kedergi?». «Alash aınasy» gazetinde osy taqyryppen jaryq kórgen maqalaǵa elimizde tikushaqtardyń apatqa ushyraýy jıilep ketýi arqaý bolǵan. «Áýe kólikteriniń apattary bizdiń elimizge tańsyq emes, jyl saıyn bireýi qulap jatqany. Ras, elimizde áýe kólikteri jasalmaıdy. Sondyqtan sý jańasyn qymbatsynyp, reti kelse, eski bolsa da arzandaý baǵamen basqalardyń eski-qusqysyn satyp alyp jatatynymyz jasyryn emes», dep jazady basylym. Maqalanyń tolyq nusqasyn gazettiń búgingi nómirinen oqı alasyzdar.

«Alash aınasy» gazetiniń dástúrli «Oı-kókpar» aıdarynda ekonomıka ǵylymynyń doktory, professor Toqtar Esirkepov pen ekonomıst-sarapshy Іlııas Isaevqa «Dıplomen - aýylǵa» bastamasyn memlekettik baǵdarlamaǵa aınaldyrý kerek pe? degen saýal qoıylǵan. T.Esirkepov «árıne «Dıplommen - aýylǵa» bastamasyn memlekettik baǵdarlamaǵa aınaldyrý kerek. Óıtkeni atalmysh bastama aıasynda aýylǵa tartylyp jatqan mamandardyń kóbisi - muǵalim, dáriger sekildi áleýmettik sala mamandary. Al bul qyzmetkerler, negizinen, memlekettik bıýdjet esebinen qarjylandyrylatyn qyzmetkerler bolǵandyqtan, olardy aýylǵa tartý baǵdarlamasy da memlekettik bolǵany jón», dese, І.Isaev «Dıplomen - aýylǵa» bastamasyn memlekettik baǵdarlamaǵa aınaldyrýdyń esh qajeti joq. Bastamany dál osy qalpynda memlekettik baǵdarlamaǵa aınaldyrǵanda jastar aýylǵa júgirip ketpeıdi. Ol úshin, eń aldymen, aýylǵa jastardy tartýdyń tıimdi tetikterin qarastyrý kerek. Máselen, aýyl sharýashylyǵy ekonomıkasyn ındýstrıaldyq negizge kóshirsek, jastar «Dıplommen aýylǵa» baǵdarlamasynsyz-aq aýylǵa aǵylar edi. Men de barar edim», depti.

***

«Egemen Qazaqstan» gazetiniń búgingi nómirinde jaryq kórgen «Úkimet» aptalyq qosymshasynda birneshe maqalalar toptamasy jarııalandy. Solardyń biri - Óskemen qalasynyń ákimi Islam Ábishevpen arada órbigen suhbat. Ekeýara áńgime barysynda qala basshysy «áleýmettik jáne ekonomıkalyq turaqty­lyqty qamtamasyz etý úshin Óskemen qalasy boıynsha "Jol kartasy" is-sharalaryn júzege asyrý jalǵasatyn bolady. Kelesi jobalardy 2,8 mlrd. teńge somasynda iske asyrý josparlanýda. «Jol kartasy» baǵdarlamasy arqyly biz árbir tıyndy únemdep, kez kelgen jaǵdaıda ony tıimdi qoldana bilýdi úırendik. Bul bizge alǵash josparlanǵannan da kóp nysandardy jóndeýimizge septigin tıigizdi, endi biz alda da osylaı qarqyndy jáne nátıjeli jumys júrgize alatyn bolamyz», depti.

«Mańyzdy mindetke joǵary jaýapkershilik kerek». «Egemen Qazaqstan» gazetiniń jazýynsha, Premer-Mınıstr Kárim Másimov Almaty qalasyndaǵy jumys saparynyń alǵashqy kúnin ońtústik astanadaǵy sporttyq nysandardy aralap kórýden bastap, 2011 jylǵy Qysqy Azııa oıyndary qarsańynda halyqaralyq shańǵy tramplıni kesheni jáne elektr podstansasy qurylysymen tanysqan. «Medeý» sport kesheni, «Shym­bulaq» taý shańǵysy kesheni jáne Balýan Sholaq atyndaǵy sport saraıynda, sonymen qatar Elbasynyń tapsyrmasymen qurylǵan «ІT Ýnıversıtette» bolǵan. Osydan keıin jıyn qalalyq ákimdikte ulasqan. «Qalalyq ákimdiktegi jıynda Almaty qalasyndaǵy 2011 jylǵy Azııa oıyndary nysandary qurylysy jáne «Bıznestiń jol kartasy-2020» baǵdar­lamasy da jan-jaqty talqylandy. Jınal­ǵandarǵa «Azııada-2011» oıynyna daıyn­dyqtaǵy uqyptylyq pen joǵary jaýap­kershiliktiń aýadaı qajettiligin eskertken Premer-Mınıstr Kárim Másimov mańyzdy is-sharadaǵy qaýipsizdik máselesin de nazardan tys qaldyrmady», dep jazady basylym.

Osy alqaly jıynǵa toqtalǵan «Alash aınasy» gazeti «bes kúnnen soń Elbasynyń tapsyrmasymen jasalǵan «Bıznestiń jol kartasy - 2020» baǵdarlamasy iske asyryla bastaıdy. Daǵdarys qyspaǵyna ushyraǵan kásiporyndardyń tamyryna qan júgirtetin jańa baǵdarlama úshin memlekettik qazynadan qomaqty qarjy bólinetin bolyp otyr», dep jazady «Bıznestiń jol kartasy» 30 mlrd teńge turady» degen taqyryppen jarııalanǵan maqalasynda. Jıynda aıtylǵan jaıttar keńinen jazylǵan joǵarydaǵy eki maqalanyń tolyq nusqasyn oqyǵyńyz kelse, basylymdardyń juma kúngi nómirinde nazar aýdaryńyz.

«EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev úsh kúndik resmı saparmen Japonııaǵa keldi. Bul sapar Qazaqstan tarabynyń Japonııanyń jańa ákimshiligimen joǵary deńgeıdegi alǵashqy baılanysy bolyp tabylady», dep jazady «Egemen Qazaqstan» gazeti. Japonııanyń Premer-Mınıstrimen kezdesken Q.Saýdabaev oǵan Qazaqstan Prezıdenti N.Nazarbaevtyń ózine yńǵaıly kez kelgen ýaqytta Qazaqstanǵa kelip-ketýi týraly jeke shaqyrýyn jáne Qazaqstan Prezıdenti men Túrkııa Prezıdenti A.Gúldiń maýsymnyń 7-9-ynda Ystambulda ótetin Azııadaǵy ózara is-qımyl jáne senim sharalary jónindegi keńes sammıtine qatysý týraly birlesken shaqyrýyn tabys etken.

***

«Ekspress-K» gazetiniń jazýynsha, keshe Astanada Reseı Memlekettik dýmasy men Qazaqstan Parlamentiniń Májilisi arasyndaǵy yntymaqtastyq týraly palataaralyq parlamenttik komıssııanyń 8-shi otyrysy ótti. Alqaly jıyn barysynda Jeńistiń 65 jyldyǵyna daıyndyq máseleleri, atap aıtqanda, qazaqstandyq ardagerlerdi estelik medaldarmen marapattaý, Qyzyl alańda ótetin áskerı sherýge qatystyrý qaralǵan. Alqaly jıyn barysynda atalǵan komıssııanyń teń tóraǵasy Oleg Savchenko Elbasy Nursultan Nazarbaevtyń Máskeýde Jeńis kúnin merekeleý sharalaryna qatysýǵa kelisim bergenin atap ótken.