Kúlásh Shámshıdınova úsh balany órtten qutqarǵan stýdentti marapattady
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova úsh balany órtten qutqarǵan stýdent Nursultan Ismaǵulovty marapattady, dep habarlaıdy QazAqparat mınıstrliktiń baspasóz qyzmetine silteme jasap.
L.Gýmılev atyndaǵy EUÝ aqparat jáne tehnologııalar fakýltetiniń 2 kýrs stýdenti, 21 jasar Nursultan Ismaǵulov Nur-Sultan qalasyndaǵy kópqabatty úılerdiń birinen shyqqan órt kezinde batyldyq tanytyp, úsh balanyń ómirin saqtap qalǵan bolatyn. Oqys oqıǵa Beıbitshilik kóshesinde boldy.
«Óz ómirin táýekelge tigip, qıyndyqqa túsken adamǵa kómek qolyn sozýǵa umtylatyn jastar maqtaýǵa turarlyq. Árıne, osyndaı batyl da erjúrek balany ósirip, tárbıelegen Nursultannyń ata-anasyna alǵys aıtqymyz keledi. Osyndaı jigerli balalardyń qalyptasýy barysynda mektep pen bilim ordalaryndaǵy ustazdardyń atqaratyn róli orasan. Bizdiń ortaq maqsatymyz - óskeleń urpaqtyń kúshti, jigerli, batyl bolyp ósýine barynsha qolymyzdan kelgenshe áreket etý. Nursultan sııaqty jastar - bizdiń zamanymyzdyń naǵyz batyrlary»,- dep atap ótti, erjúrek stýdentti marapattaǵan Bilim jáne ǵylym mınıstri K.Shámshıdınova.
Sol kúni Nursultan dostarymen astanalyq saıabaqtardyń birinde serýendep júrgen. Adamdardyń shýlap jatqanyn estip olar oqıǵa bolǵan jerge dostarymen tez jetedi. Turǵyn úıdiń ekinshi qabatynan er adamnyń kómekke shaqyrǵan daýysyn estıdi. Nursultan eshbir kidirmesten tómende ornalasqan dúkenniń shatyry arqyly úıdiń ekinshi qabatyna kóterilip, úıdiń terezesin syndyryp, úsh balany órtke oranǵan páterden alyp shyqqan.
Oqıǵa ornyna jetken órt sóndirýshiler páterde qalǵan taǵy bir kishkentaı bóbek pen otaǵasynyń ómirin arashalap qaldy.
