Kúlásh Shámshıdınova sapaly maman daıarlaý úshin qandaı sharalar qolǵa alynatynyn aıtty
NUR-SULTAN. QazAqparat - Búgingi Úkimet otyrysynda elimizdiń Bilim jáne ǵylym mınıstri Kúlásh Shámshıdınova suranysqa ıe sapaly maman daıarlaý boıynsha júzege asyrylatyn sharalardy atady, dep habarlaıdy QazAqparat tilshisi.
«Joǵary suranysqa ıe sapaly maman daıarlaý úshin múddeli memlekettik organdar birlese jumys atqarýy kerek. Osy oraıda kelesi sharalardy iske asyrýǵa qoldaý kórsetýińizdi suraımyn: Ulttyq biliktilik júıesi máseleleri jónindegi biryńǵaı vedomstvoaralyq ortalyq qurý; eńbek naryǵynyń kadrlarǵa qajettilik boljamyn anyqtaý, bolashaq kásipterdiń tizimin qalyptastyrý; kásibı standarttardy ázirleýdi aıaqtaý, árbir sala boıynsha biliktilik sheńberin anyqtaý; biliktilikti rastaýdyń táýelsiz salalyq ortalyqtaryn qurý; qarjylyq derbestikke jáne basqarýdyń alqalyq túrlerine múmkindik beretin kolledjderdiń uıymdyq-quqyqtyq nysandarynyń ózgerýin qamtamasyz etý; óńirler ekonomıkasynyń damýyn eskere otyryp, memlekettik tapsyrysty bólýdi aldaǵy ýaqytta qaıta qaraý; senimgerlikke beriletin kolledjderde ár stýdent úshin yntalandyrý komponentin qarastyrý», - dedi mınıstr.
K.Shámshıdınovanyń aıtýynsha, Bilim mınıstrligi bilim baǵdarlamalaryn ıntegratsııalaýdy qamtamasyz etedi. Oqý ádebıetteri men oqý-ádistemelik keshender sapasyn arttyrý, pedagogıkalyq kadrlardy jáne óndiristik oqytý sheberlerin daıarlaý, olardyń biliktiligin arttyrý jumystaryn jalǵastyrady.
«Óndiris pen bilim salasynyń kadr daıarlaýdaǵy áriptestigi nátıjesinde oqý oryndaryn kásiptik salalyq ortaǵa tartýǵa, oqytýshylar men óndiristik oqytý sheberlerin taǵlymdamadan ótkizýge, kolledj menedjmenti men marketınginiń jańa formatyn qalyptastyrýǵa, kásiporyn jumyskerlerin tálimgerlikke tartýǵa qol jetkizemiz. Sonymen qatar, bitirýshilerdiń óz mamandyǵy boıynsha jumysqa ornalasý múmkindigi artady. Jalpy, usynylyp otyrǵan sharalar eńbek naryǵynyń talaptaryn eskere otyryp, kadr daıarlaý sapasyn jaqsartýǵa múmkindik beredi», - dedi K.Shámshıdınova.
