Kúlásh Shámshıdınova: Mekteptegi balalar tárbıesine ata-analar atsalysýy kerek

JAŃAÓZEN. QazAqparat - Óńirge is-saparmen kelgen QR Bilim jáne ǵylym mınıstri Kúlásh Shámshıdınova Jańaózendegi mektep oqýshylarymen kezdesti, dep xabarlaıdy QazAqparat tilshisi.

Kúlásh Shámshıdınova Jańaózen mektep-gımnazııasyndaǵy oqýshylarmen tildesip, olarmen erkin suxbat qurdy.

«Ata-ananyń mindetin ata-ana, muǵalimniń mindetin muǵalim ǵana atqara alady. Mekteptegi balalar tárbıesine ata-analar atsalysýy kerek. Ustazdarǵa artyp qoıyp, qarap otyrýǵa bolmaıdy. Balalar tárbıesin eki jaqtap atqarýǵa shaqyramyn», - Bilim mınıstri.

Onyń aıtýynsha, 2009 jyldan bastap muǵalimderdiń jalaqysy kezeń-kezeńmen ósip keledi. Máselen, 2011 jyly - 30%-ǵa, 2014 jyly - 10%-ǵa, al 2016 jyly 29%-ǵa ósti. Bul protsess jalǵasyp jatyr.

«Qazir 15 jyldyq jumys tájirıbesi bar 1-sanattaǵy muǵalimniń jalaqysy tolyq 18 saǵattyq júktememen qalalyq jerlerde 147 myń teńgege, aýylda 180 myńǵa deıin jetedi. Biz muǵalimge birdeı joǵary talaptar qoıamyz, óıtkeni, biz bilim berý sapasyna qol jetkizemiz. Osyǵan baılanysty respýblıkada 144 myń muǵalim qaıta daıarlaý kýrstaryn ótedi. Sondaı-aq, 82 myń psıholog pen synyp muǵalimderi oqytylady», - dedi Kúlásh Shámshıdınova.

Bas ustaz qaladaǵy gımnazııa mektebinde ustazdarmen kezdesip, sabaqqa qatysty. Osydan 18 jyl buryn ashylǵan bilim ordasynda 965 oqýshy bilim alýda.

Aıta keteıik, Táýelsizdik alǵannan beri Mańǵystaýda 55 mektep salynǵan. Aldaǵy úsh jylda taǵy 8 mektep ashylmaq.

Eske salsaq, búgin Qazaqstan Respýblıkasy Premer-Mınıstriniń orynbasary Gúlshara Ábdiqalyqova bastaǵan Úkimet músheleri Mańǵystaý oblysyna kelgendigin habarlaǵan bolatynbyz.