Kúlásh Shámshıdınova mektep dırektorlaryn taǵaıyndaýǵa qatysty usynysty qoldady
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova mektep dırektorlaryn taǵaıyndaýǵa qatysty usynysty qoldady, dep xabarlaıdy QazAqparat tilshisi.
Úkimet úıinde ótken baspasóz máslıxatynda jýrnalıster oqyrmandardyń tarapynan túsken bir usynysty oqyp berdi.
«Búginde mektep dırektorlarynyń bes jyldan artyq ýaqyt otyratyn jaǵdaılary óte kóp. Sony bes jylda bir ret oqytýshylardyń saılaýy arqyly júrgizýge bolmaı ma?», - deıdi oqyrmandar.
QR Bilim jáne ǵylym mınıstri Kúlásh Shámshıdınovanyń aıtýynsha, búginde tsıfrlyq texnologııalardyń arqasynda biraz protsesterdi ashyq júrgizýge múmkindik bar.
«Mysaly, Túrkistan oblysy men Shymkent qalasy boıynsha muǵalimniń bárin «blatpen» alady dep aıtady. Qazir bárin elektrondy túrde jasaıdy. Sol jerde testten ótedi. Sodan keıin kim qabyldandy, kim qabyldanǵan joq. Bári tur. Biz soǵan báribir kelemiz. Al dırektorlardyń bes jylda aýysyp turýyna baılanysty usynys, shynyn aıtý kerek, maǵan qatty unaıdy. Biraq qoǵamdy bilesizder. Biz qoǵammen aqyldasyp, bárin zańdastyrýymyz qajet. Qazir mektep dırektorlarynyń bosaǵan oryndary konkýrs arqyly ótedi. Osyny tolyqtyrýymyz kerek. Bir aqyldasyp alaıyq. Shyn máninde, bul durys bolar edi dep esepteımin», - dedi K.Shámshıdınova.
Aıta keteıik, búgingi brıfıngte bilim mınıstri bilim qyzmetkerleriniń jalaqysyn kóterý sharalary týraly aıtty. Atalǵan tapsyrmany QR Tuńǵysh Prezıdenti - Elbasy Nursultan Nazarbaev bergen bolatyn.
Oǵan sáıkes, jalaqysy tómen bıýdjettik sala qyzmetkerleriniń jalaqysy 30 kóterilýi kerek. Búginde arnaıy tarıftik koeffıtsent bekitildi.
Budan bólek, Kúlásh Shámshıdınova jalaqynyń qalaı artatynyn naqty mysalmen kórsetti.
