«Qulanshy» qazirgi zamanǵy óner ortalyǵy: kórmeden sheberlik synyptarǵa deıin (FOTO)
ASTANA. QazAqparat - Elordadaǵy «Qulanshy» qazirgi zamanǵy óner ortalyǵy 2007 jyly ashyldy. Ortalyqta otandyq jáne sheteldik sýretshilerdiń kórmeleri, sheberlik dáristeri jıi ótkizilip turady. Sondaı-aq úlkenderge jáne balalarǵa arnalǵan beıneleý óneriniń stýdııalary jumys isteıdi, dep habarlady Astana qalasy ákiminiń resmı saıty.
- Biz 10 jyl buryn qazaqstandyq jáne sheteldik sýretshilerdiń kórmelerinen bastadyq. Jyl ótken saıyn árbir jobadan qýat alyp, búginde júzdegen kórme ótkizip úlgerdik. Kórme ótkizý protsesiniń qarqyny joǵary. Budan basqa, aǵartýshylyqpen de aınalysamyz. Dáris oqyp, sheberlik synyptaryn uıymdastyramyz, - deıdi «Qulanshy» qazirgi zamanǵy óner ortalyǵynyń jetekshisi Leıla Mahat.
Ortalyqta shyǵarmashylyqtyń barlyq túri qoldaý tabady, akademııalyq sýret salý, stanokty keskindeme, balalar kreatıvin damytý, qysh-qumyra jasaý óneri, sheshendik óner stýdııalary bar, tipti kınematografııa kýrstary da ótkizildi. Munda úsh jastan asqan balalar óz daryndylyǵyn damytady.
Jasóspirimderge arnalǵan stýdııalarda sabaqtar klassıkalyq kórkemdik bilim berý júıesimen ótkiziledi. Múldem sýret sala almaıtyndarǵa arnalǵan sabaqtar da uıymdastyrylady. Sózben aıtyp jetkize almaǵanyn, sýret arqyly jetkizýdi úırengisi keletinder úshin qazirgi zamanǵy keskindeme kýrstary da ashylǵan. Sonymen qatar, ortalyqta erekshe qajettilikteri bar balalarǵa arnalǵan stýdııa alty jyldan beri qyzmet etip keledi.
«Qulanshy» ortalyǵynyń ónerin qala kóshelerinen de tamashalaýǵa bolady.
- Qazaqstan halqy Assambleıasynyń jyly ótkende jylqylardyń, jaqynda EKSPO-adamdardyń músinderin, Qazaqstan aýmaǵynda mekendeıtin Qyzyl kitapqa engen janýarlardyń aınaly polıgonaldy modelderin jasadyq. Jylqylar osy kúnge deıin tur. Basqa ınstallıatsııalarymyz da qajet bolady dep úmittenemin, - deıdi Leıla Mahat.
Qazirgi kezde Beıbitshilik jáne kelisim saraıynda ornalasqan «Qulanshy» ortalyǵynda 50 jýyq adam bilim alyp júr. 
