Qulandardy elimizdiń basqa óńirlerine jersindirý kerek - senator
NUR-SULTAN. QazAqparat - Qulandardy elimizdiń basqa óńirlerine de jersindirý kerek. Bul týraly búgin Senattaǵy «Qazaqstandaǵy bıologııalyq alýantúrliliktiń saqtalýyn zańnamalyq qamtamasyz etýdiń ózekti máseleleri» atty Úkimet saǵatynda senator Muhtar Qul-Muhamed aıtty, dep habarlaıdy QazAqparat tilshisi.
Senatordyń aıtýynsha, búginde Qazaqstanda 5 myńǵa jýyq qulan bar jáne erekshe qorǵaýǵa alynǵandyqtan jyldam kóbeıip, aldaǵy ýaqytta 10 myń basqa jetýi múmkin. Jalpy qulandardyń basym bóligi «Altynemel» ulttyq tabıǵı parki aýmaǵynda tirshilik etedi jáne kúrt kóbeıip ketýine baılanysty aldaǵy ýaqytta jaıylymdyq jerden tarshylyq kórýi yqtımal. Sondyqtan olardy Qazaqstannyń basa da óńirlerine jersindirý kerek.
«Torǵaı dalasyna, Tarbaǵataı taýyna jiberý kerek dep esepteımiz. Qazir baıandamada Qostanaı oblysyna 9 bas qulan jiberildi degen sóz aıtyldy. 5 myńnan astam qulany bar elge jylqy tektes úıirimen júretin janýardy 8-9-dan emes 100-dep jberý kerek. Sonda ǵana olar ózderin jyrtqysh ańdardan qorǵaı alady», - dedi Muhtar Qul-Muhamed.
Osy máselege baılanysty túsinikteme bergen QR Ekologııa, geologııa jáne tabıǵı resýrstar vıtse-mınıstri Erlan Nysanbaev sońǵy 30-40 jylǵy tájirıbeni paıdalana otyryp, qulandardy elimizdiń basqa óńirlerine jersindirýmen aınalysatyn ortalyq ashylǵanyn atap ótti.
«Búgingi kúni Jambyl oblysyna 40 bas, Qostanaı oblysyna 9 bas qulandy kóshirdik desek, sol kóshirýdiń ózi úlken qııamet. Sebebi, ár malǵa arnaıy konteıner jasaý qajet, al ol qarajatqa kelip tireledi. Qazir ortalyq quryp, onyń josparyn túzip, jumysty eń aldymen osy qulannan bastap otyrmyz. Óıtkeni, «Altynemeldegi» qulannyń jaǵdaıy qıyndaý. Sebebi ol jerde 3,5 myń bas bar. Dál sondaı bas qaraquıryq bar. Búginde ekeýiniń arasynda jem-shópke talastyq bar. Sondyqtan Іle-Balqash rezervatyn qurdyq», - dedi vıtse-mınıstr.
