Qulaly aralyndaǵy adam: Prezıdent Teleradıokesheni jańa derekti fılm usynady
ASTANA. KAZINFORM - Prezıdent Teleradıokesheni túsirgen «Qulaly aralynyń adamy» derekti fılmi kórermenge jol tartady.
Fılm Kaspıı teńizinde shalǵaıda ornalasqan Qulaly aralyndaǵy gıdrometeorologııalyq stansa bastyǵy Lýpenkov Petr Ivanovıchtyń ómiri men jumysy jaıynda syr shertedi. Bul - ekstremaldy klımat jaǵdaıynda otyz jyldan astam ýaqyt boıy qyzmet etip kele jatqan, syrttaı aral qojaıyny atanyp júrgen ańyz adam jaıly tarıh.
Kórermen meteorologtiń kúndelikti jumysynan biregeı kadrlardy tamashalaı alady: árbir úsh saǵat saıyn derekterdi jınaý, aýa raıy málimetterin jiberý, avıatsııa men teńiz kemeleri úshin daýyldy aldyn ala eskertý. Petr Ivanovıchtyń estelikteri prızmasy arqyly onyń júrip ótýge májbúr bolǵan synaqtar syry ashylady: múldem oqshaý ómir, baılanys joq jáne tamaq qorynyń azdyǵy. Ol 90 jyldary stansany saqtap qalý, ǵımaratty otynǵa buzyp alýdan qorǵaý jolyndaǵy janqııarlyq jumysymen, jeıtin tamaqtan balyq pen jabaıy qustyń eti ǵana bolǵan kezderimen bólisedi.
Petr Ivanovıchtyń ómir, tarıhy - kásibı sheberlik jaıyndaǵy áńgime ǵana emes, sonymen birge tabıǵatqa degen súıispenshilik, kúnkóris fılosofııasy, myqty rýh pen qarapaıym qýanyshty sátter haqynda. Fılmniń bas keıipkeri dál sondaı jaǵdaıda balalaryna tálim-tárbıe berip, kásipke degen adaldyqty qalaı saqtap qalǵanymen bólisedi.
Fılm - óz isińe degen tabandylyqtyń, janqııarlyqtyń jáne adaldyqtyń shabyttandyrar jylnamasy. Lýpenkov Petr Ivanovıchtyń tarıhy - esh qıyndyqqa moıymastan barshanyń ıgiligi jolynda óz jumysyn jalǵastyra beretin kásipqoılardyń mańyzdylyǵyn eske túsiredi.
Derekti fılm 1 naýryz kúni saǵat 18:30-da «Jibek joly» telearnasynyń efırinen kórsetiledi.
Aıta ketelik «Kýáger» atty Prezıdent Teleradıokesheniniń jańa derekti fılmi jaryqqa shyqqan edi.