Qulaqqaptyń paıdasy men zııany: Dáriger Aıgúl Shaketovanyń keńesi
ASTANA. QazAqparat - Búgingi jastar uıaly telefonǵa jıi úńilip, kózderiniń kórýin nasharlatýmen qatar, qulaqtaryna únemi qulaqqap salyp júrý arqyly estý qabiletterinen aıyrylýda. Bul týraly D. Qalmataev atyndaǵy Semeı memlekettik medıtsına kolledjiniń ÁBK tóraıymy, jartylystaný ǵylymdary boıynsha ǵylymı pánder tsıkliniń meńgerýshisi Aıgúl Shaketova aıtty, dep habarlaıdy Altaynews.kz.
«Mýzyka tyńdaǵan durys-aq, biraq qulaqqappen emes, radıodan, magnıtafonnan da tyńdasa bolady, jastarymyz osyny eskerse eken. Qulaqqap bizge yńǵaıly, jaqsy bolyp kóringenmen, ýaqyt óte kele onyń qandaı aýrýlarǵa shaldyqtyratynyn eskere bermeımiz. Bar qateligimiz osynda. Adam qulaqqapty paıdalanǵanda birtindep kereńdik aýrýyna tap bolady. Onymen qosa, ózine artyq radıotolqyn men shekten tys bıotok qabyldaıdy. Bul aǵzada ártúrli aýrýlar týǵyzady. Zertteý barysynda qulaqqapty uzaq ýaqyt, máselen 3 saǵattan artyq tyńdaǵanda adamnyń bas mıynyń tamyrlary tarylyp, ottegi jetkiliksizdiginen bas aýrýy paıda bolatyndyǵy anyqtaldy. Buny men dáriger-maman retinde eskertemin. Sonymen qatar ashýshańdyq, úreılený, ıaǵnı stress damıdy. Eń qaýiptisi - qulaqqaptyń quramynda magnıtti dybys taratatyn qurylǵy ornalasqandyqtan bul qurylǵynyń elektr energııasyn kóp qajet etetindigi bar. Kópshilik qulaqqap paıdalanýshylardyń telefon qýaty tez sónip qalatyny da osy sebepten. Qulaqqaptyń birden áser etetin múshesi - qulaq. Eń birinshi kórinetin, belgi beretin aýrý - kereńdik. Adam qulaǵy estimegendikten kóp aqparattardy durys qabyldaı almaıdy.Ýaqyt óte kele, jasy 45-ten asqannan keıin estýi tipti qıynǵa soǵýy múmkin», - deıdi Aıgúl Shaketqyzy.
Ustazdyń aıtýynsha, qulaqqap arqyly ártúrli mıkroaǵzalar denege taralýy múmkin. Bul qulaqtyń otıt, parotıt aýrýlaryna alyp keledi. Osynyń aldyn alý úshin qulaqqapty qulaqqa salar alynda 70 paıyzdyq spırtpen óńdep, tazartyp alǵan jón.
Ǵalymdardyń zertteý nátıjesi boıynsha, qazirgi kezde eń kóp mıkroaǵzalar uıaly telefon, qulaqqap jáne aqshada taralǵan. Sondyqtan qulaqqapty paıdalanýdy birte-birte qysqartý kerek. Kúnine 1 saǵattan artyq tyńdaýǵa bolmaıdy. Osy ýaqyttyń ishinde de adam radıotolqyndy qabyldaıtyndyǵyn umytpaý qajet.
Degenmen, qulaqqaptyń paıdasy da bar bolyp shyqty. Mysalǵa ony uıaly telefonmen ekinshi bir adammen sóıleskende, sensorly telefonnan bólinetin radıotolqyndy azaıtý úshin qoldanýǵa bolady. Bul rette, bir orynda turyp sóılesken jón eken.
