Qulaǵynyń estý kemistigi bar jasóspirimder endi reprodýktıvti densaýlyq týraly aqparattan shettetilmeıdi
ALMATY. Qarashanyń 3-i. QazAqparat /Názıra Eleýhan/ - Qoǵamdyq densaýlyq saqtaý ınstıtýty «Úmit» sańyraýlardy jáne múgedekterdi qoldaý ortalyǵymen birlesip Dúnıejúzilik banktiń Ortalyq Azııada SPID-ke baqylaý jónindegi jobasyn júzege asyrý basqarmasy tobynyń qarjylyq qoldaýy arqyly «Sańyraýlar jáne VICh» jobasyn iske asyrdy.
Bul týraly búgin «Qazaqstandaǵy sańyraý adamdardyń problemalary» atty baspasóz májilisinde aıtyldy, dep habarlaıdy QazAqparat.
«Nashar estıtin jáne sańyraý adamdar múmkindigi shekteýli basqa adamdar sııaqty VICh, seksýaldy jáne reprodýktıvti densaýlyq týraly aqparattan ádette «shettetilip» qalady. Olardyń muqtajdyqtaryna nazar aýdarylmaıdy. Dástúrli baǵdarlamalar osy toptardaǵy adamdardyń qajettilikterine beıimdelmegen. Sonyń saldarynan sańyraý adamdar «VICh», «SPID» týraly habardar emes. Sańyraý adamdar úshin ymmen sóılesý tili aralasýdyń negizgi tili bolyp tabylady. Osy sóılesýdiń grafıkalyq tiliniń kómegimen jazylǵan VICh, SPID týraly materıaldar is júzinde joq. Sonymen qatar, jasóspirim-múgedekter ıntımdik máselelerden habardar etetin ymmen sóılesýdiń «mádenı» tilin meńgermegen», deıdi «Úmit» sańyraý múgedekterdi qoldaý ortalyǵynyń jetekshisi Amanbıke Erǵalıeva.
Onyń aıtýynsha, bul joba qulaǵynyń estý kemistigi bar múgedek-balalarǵa VICh-tiń aldyn-alý máseleleri boıynsha habardar bolý deńgeıin arttyrýǵa múmkindik beredi. Al ázirlengen ádistemelikter VICh-tiń taralýynyń aldyn-alý jónindegi aqparattardy balalarǵa jetkizýge kómek beredi.
Esterińizge sala keteıik, búgingi kúni elimizde nashar estıtin jáne sańyraý 155 000 azamat esepke alynǵan.
