Qulaǵy sol jaq betine ornalasqan shymkenttik búldirshinge Almatyda ota jasalady
ShYMKENT. QazAqparat - Qulaǵy sol jaq betine ornalasqan shymkenttik búldirshinge ota Almatyda jasalatyn boldy. Bul týraly eki jasar Nyshanbektiń anasy Áıgerim Álimbaeva aıtyp berdi, dep habarlaıdy QazAqparat tilshisi.
«Balamyz týraly BAQ-ta jazylǵan soń demeýshiler tabyldy. Biraz qarattyq. Jergilikti dárigerler de tez arada tekserýden ótkizip, Almatydaǵy «Aqsaı» respýblıkalyq balalar aýrýhanasyna kezekke qoıdy. Alaıda biz bul joldama boıynsha emdeýden bas tarttyq. Sebebi, balamdy qarap júrgen dáriger Almatyda 5-shi qalalyq aýrýhanada bilikti professor bar ekenin aıtqan bolatyn. Biz endi portal arqyly sáýir aıynyń 19 kúni sonda ota jasatýǵa baratyn boldyq. Almatyǵa bir ret baryp, qaralyp keldik», - deıdi búldirshinniń anasy.
Eske salaıyq, buǵan deıin qulaǵy sol jaq betine ornalasqan búldirshinniń anasy shuǵyl ota jasatýǵa jurttan kómek suraǵan bolatyn. Sebebi, týa bitken qulaq aýyz kemistigi bar balanyń estý qabileti nasharlaı bastaǵan. Naýqas balasynyń aýzyn tigýden jergilikti dárigerler bas tartyp, múgedektikke de shyǵara almaǵan eken. Aq halattylar búldirshin narkozdy kótere almaı qalýy múmkin ekenin alǵa tartqan edi.
