«Kýlagınniń uly «qulady», al ózgeler qazaq tilin qanshalyqty meńgergen?» - BAQ-qa sholý
***
«Úrjar aýdanyn kóktep ótetin Taskesken-Baqty tas jolynyń boıyndaǵy Laıbulaq jáne Jańa tilek aýyldarynyń orta tusynan altyn adamnyń súıegi tabyldy. Esik qorǵanynan tabylǵan altyn adamdikindeı basyndaǵy sáýkelesi men ústindegi kıimi ájeptáýir, súıegi sol qalpy jaqsy saqtalǵan. Bári de altyn zerli», - dep jazady «Egemen Qazaqstan» gazeti búgingi sanyndaǵy «Taǵy bir «Altyn adam» tabyldy!» degen taqyryptaǵy maqalasynda. Basylymnyń jazýynsha, budan ózge soltústik-shyǵys jaǵyndaǵy irgesindegi bólek zırattan taǵy bir máıit shyqqan. Onyń basy, qoly kesilip tastalǵan. Ǵalymdardyń paıymdaýynsha, bul hanshaıymnyń quly, bálkim, kúńi bolýy yqtımal. Saq zamanynyń bıleýshisiniń qyzy bolýy múmkin degen bul altyn adamdy zertteýshi ǵalymdar «Úrjar hanshaıymy» dep otyr.
Keshe Parlament Májilisiniń Tóraǵasy Nurlan Nyǵmatýlınniń jetekshiligimen palatanyń kezekti jalpy otyrysy bolyp ótti. Onda aldyn ala bekitilgen kún tártibine sáıkes birqatar zań jobalary qaraldy. Osy jıyn arqaý bolǵan maqala el gazeti «Egemen Qazaqstanda» «Qarjy jumsaýdaǵy qyrsyzdyqtar» degen taqyryppen berilgen. «Esep komıteti ortalyq memlekettik organdardyń bıýdjettiń 41,8 mıllıard teńgesin paıdalanbaǵanyn alǵa tartty. Vedomstvo tóraǵasy Aslan Mýsınniń málimetine qaraǵanda, jergilikti atqarýshy organdar 50,5 mıllıard teńgeni ıgermegendikten, 24 mıllıardy bıýdjetke keri qaıtarylǵan. Sondaı-aq, kvazımemlekettik sektor sýbektileri 21,8 mıllıard teńgeni ıgermepti. Osylaısha esepti kezeń ishinde 114,1 mıllıard teńge somasyndaǵy bıýdjet qarajaty paıdalanylmaı qalǵan»,- dep jazady basylym.
***
«Aıqyn» gazetiniń búgingi sanynda tarıh ǵylymdarynyń doktory, professor Mámbet Qoıgeldimen aradaǵy suhbat «Repressııanyń ashylmaǵan bir baǵyty - bıliktiń ǵalymdardy qýdalaýy» degen taqyryppen berilgen. Basylymnyń barlyq saýalyna tuşymdy jaýap bergen ǵalym: «Qazaqstanda qýdalaý basqasha sıpatta júrgizildi. Qazaq ǵalymdarynan da bolshevıktik kózqarasty qabyldaý talap etildi, sonymen qosa «býrjýazııalyq ultshyldyq kózqarastasyń dep, sondaı-aq qazaq ultshyldary» dep aıyptady», - deıdi.
«Sonymen atqarýshy bıliktegi ákimder men oryntaqqa qyzyǵýshylardyń tún uıqysyn tórt bólip, eki aptaǵa sozylǵan test tapsyrý naýqany da aıaqtaldy. Laýazymdy mansap ıelengisi keletinderdiń qarasy tym mol bolǵandyǵyn «A» korpýsyna úmit etýshilerdiń 2024 adamǵa jetkeninen de ańǵarý qıyn emes», - dep jazady «Aıqyn» gazeti. Basylymnyń jazýynsha, ázirshe úmitkerlerdiń úshten biri synaqtan súrindi, qalǵandarynyń birden baǵy janyp, jaıly oryntaqqa otyra salý da ekitalaı. Sebebi 4 maýsymda synaqtyń ekinshi kezeńi, ıaǵnı Kadr saıasaty jónindegi ulttyq komıssııanyń áńgimelesý jumystary bastalady. Maqala «Kýlagınniń uly «qulady», al ózgeler qazaq tilin qanshalyqty meńgergen?» degen taqyryppen berilgen.
***
«Atyraýda erekshe kontsert ótip, onda bir mezette myńnan astam mýzykant qazaqtyń uly kompozıtory Qurmanǵazynyń kúıin oryndady» dep jazady «Ekspress-K» gazeti «Kıýı do Gınnesa dovedet» degen taqyryptaǵy maqalasynda. Basylymnyń atap ótýinshe, atalǵan ıdeıa jergilikti bılikke tıesili eken. Sharaǵa Qazaqstannyń oblystarynan jáne Reseıden shyǵarmashylyq ujymdar shaqyrylǵan. Jınalǵan óner ujymdary «Munaıshy» ortalyq stadıonynda Qurmanǵazynyń, Dına men Táttimbettiń jáne Nurǵısa Tilendıevtiń kúılerin oryndaǵan.
