Kýlagın sý ótkizý nysandarynyń daıyndyǵyn pysyqtady
KÓKShETAÝ. QazAqparat - Aqmola oblysynyń əkimi Sergeı Kýlagınniń tóraǵalyǵymen ótken apparat keńesinde óńirde kóktemgi sý tasqynyn aldyn alý sharalary talqylandy, dep habarlaıdy «QazAqparat» HAA tilshisi əkimdiktiń baspasóz qyzmetine silteme jasap.
Apparat keńesinde aımaqtyq TJD basshysy Alekseı Sovetov aldaǵy kóktemgi sý tasqyny maýsymyn qaýipsiz ótkizý baǵytynda atqarylyp jatqan jumystar týraly aıtyp berdi.
Onyń sózine qaraǵanda, departament pen oblys əkimdigi birlesip, kóktemde sý tasqynynyń aldyn alý josparyn jasaǵan.
Məselen, Bulandy aýdanynda 11,8 shaqyrym aryq tazartylǵan. Tselınograd aýdanynda ózenniń jaǵasy bekitilse, Shortandy aýdanynda ózenniń túbi tazartylǵan. Qorǵaljyn aýdanynda 32,2 shaqyrym bóget jóndeldi. Oǵan qosa, Bulandy, Tselınograd, Arshaly jəne Atbasar aýdandarynda 13 sý ótkizý nysany ornatylsa, Ereımantaý, Shortandy aýdandarynda 1,6 shaqyrym ýaqytsha bóget salyndy.
Sonymen qatar, oblys aýmaǵynda jergilikti atqarýshy organdardyń kúshteri men qarjysy daıarlandy. Onyń ishinde 2588 adam, 1220 birlik tehnıka (574 kommýnaldyq, 298 sý sorǵysh jəne 66 sý júzetin) bar.
Kóktemgi sý tasqynyn aldyn alý jəne zardaptaryn joıý úshin TJD, QR Ulttyq ulan, ІІD jeke quramynan 485 adam jəne 103 arnaıy tehnıka men 5 júzý quralyn tartý josparlanǵan.
Keńes sońynda aımaq basshysy Kókshetaý, Stepnogorsk qalalary men aýdan əkimderine qaýipti kezeńinde jedel shtab jumysyn təýlik boıy uıymdastyrýdy tapsyrdy.
«Sý ótkizý nysandaryn tazalaý jəne olardyń sý ótkizýdegi daıyndyǵyn 20 naýryzǵa deıin anyqtaý qajet. Jasandy sý qoımalarynda aǵyp kelgen sýlardyń ýaqytynda ótkizý, oǵan qosa, muz jarý jumystaryn tıisti deńgeıde júrgizýdi tapsyramyn», - dedi S.Kýlagın.
