Kýlagın Sandyqtaýdaǵy balalar úıin jóndeýge 1 mlrd teńge bóldi
KÓKShETAÝ. QazAqparat - Bıyl Sandyqtaýdaǵy balalar úıine kúrdeli jóndeý jumystary júrgiziledi.
Bul týraly Aqmola oblysy ákimi Sergeı Kýlagınniń atalǵan aýdanǵa jumys sapary barysynda aıtyldy, dep habarlaıdy «QazAqparat» HAA tilshisi ákimdiktiń baspasóz qyzmetine silteme jasap.
Aımaq basshysy Sandyqtaý aýylyndaǵy jetimder jáne ata-anasynyń qamqorlyǵynsyz qalǵan balalarǵa arnalǵan №3 balalar úıinde boldy. Búgingi kúni munda 61 bala tárbılenýde. Onyń 58-i mektep jasyndaǵy bolsa, 3-eýi - mektepke deıingi jastaǵylar. 
Jarty ǵasyrdan astam ýaqyt buryn salynǵan kóne ǵımarat búginderi kúrdeli jóndeýdi qajet etedi. Sol sebepti, oblys ákimdigi ǵımaratty jańǵyrtý úshin bıylǵy jylǵa 1 mıllıardtan astam teńge qarjy qarastyryp otyr. Aımaq basshysy oblystyq bilim basqarmasynyń basshylyǵymen ǵımarattyń balalarǵa jaıly bolýy úshin kúrdeli jóndeý jumystarynyń josparyn talqylady.
«Balalar jatatyn korpýstaǵy bólmeler burynǵydaı úsh-tórt adamǵa emes, eki balaǵa laıyqtalyp qaıta jasaqtaldy. Birinshi qabatta medıtsınalyq pýnkt qarastyrylǵan. Sonymen qatar, tehnologııalyq jabdyqtar aýystyrylyp, balalardyń osyndaı tálim-tárbıe alýyna barlyq jaǵdaı jasalynbaq. Aldaǵy ýaqytta Esildegi balalar úıindegi tárbıelenýshiler de osynda kóshirilýi múmkin», - deıdi atalǵan mekemeniń dırektory Valentına Kryjanovskaıa.
Atalǵan balalar úıine josparlanǵan jumystar oblys ákiminiń jeke baqylaýynda bolady.
Aıta keteıik, ótken jyly S.Kýlagınniń tapsyrmasymen Aqkóldegi balalar úıine 761,4 mıllıon teńgege kúrdeli jóndeý jumystary júrgizilgen bolatyn.
