Kýlagın óńirge jumys saparymen kelgen Májilis depýtattarymen kezdesti
KÓKShETAÝ. QazAqparat - Aqmola oblysynyń ákimi Sergeı Kýlagın óńirge jumys saparymen kelgen QR Parlamenti Májilisiniń depýtattaryn qabyldady, dep habarlaıdy «QazAqparat» HAA tilshisi.
Aımaq basshysymen kezdesken Májilis depýtattary atynan Sapar Ahmetov jumys saparlarynyń maqsat jospary jaıynda aıtyp berdi. Oblysymyzdyń birqatar óńirlerinde bolyp, jurtshylyq ókilderimen kezdesýler ótkizetin halyq qalaýlylary jergilikti jerdegi atqarylyp jatqan istermen tanysyp, kópshiliktiń oı-pikirlerin tyńdamaq. Oblys ákimi depýtattardyń zań shyǵarý sııaqty mańyzdy jumyspen aınalysyp, elimizdiń damýyna eleýli úles qosyp jatqandyǵyn aıta kele, osyndaı aýyr da, jaýapty jumystaryna tabys tiledi.
«Ótken jyly elimiz óz táýelsizdiginiń 25 jyldyǵyn atap ótkendigi belgili. Osy kezeń ishinde Qazaqstan úlken tabystarǵa qol jetkizdi. Astanalyq oblysta da atqarylǵan ister men qol jetken jetistikter az emes», dedi S.Kýlagın.
Odan ári aımaq basshysy agrarlyq aımaqtan agrarlyq-ónerkásiptik aımaqqa aınalǵan óńirimizdegi atqarylǵan sharýalar jaıynda baıandap berdi.
«Sońǵy jyldarda oblysymyzda kóptegen iri ónerkásip salasyndaǵy jobalar júzege asyrylyp, ónerkásip ónimderi kólemi arta tústi. Ótken jyly oblys qurylysshylary turǵyn úı salý josparyn 145 paıyzǵa oryndap, kóptegen otbasylary baspanaly boldy. Memlekettik baǵdarlamalardyń bári oryndalýda. Jyl qorytyndysyna saı memlekettik baǵdarlamalar boıynsha bólingen qarjy 99,3 paıyz kóleminde ıgerilgen. Oblysta aýyl sharýashylyǵy salasynyń jetistigi aýyz toltyryp aıtarlyqtaı. Ótken kúzde oblys dıqandary qazirgi zamańǵy ozyq agrotehnıkalyq sharalardy qoldanýdyń arqasynda 5,7 mıllıon tonna astyq jınady», deı kele aımaq basshysy Astana qalasynyń aınalasynda azyq-túlik beldeýin damytýda Aqmola oblysynyń úlesi zor ekenin atap ótti.
