Kýlagın qaramaǵyndylarǵa bıýdjet qarjysyn tıimdi paıdalanýdy qamtamasyz etýdi tapsyrdy
KÓKShETAÝ. QazAqparat - Aqmola oblysynyń ákimi Sergeı Kýlagınniń tóraǵalyǵymen ótkizilgen kezekti apparat keńesinde bıýdjet qarjysyn tıimdi paıdalanýdy qamtamasyz etý máseleleri qaralyp, osy baǵytta júzege asyrylýǵa tıisti naqtyly mindetter belgilendi, dep habarlaıdy «QazAqparat» HAA tilshisi ákimdiktiń baspasóz qyzmetine silteme jasap.
Apparat keńesine oblys ákiminiń orynbasarlary, oblystyq departamentter men basqarmalardyń basshylary, buqaralyq aqparat quraldarynyń ókilderi qatysty. Oblys ákimi jańa jyl merekesi kúnderi tótenshe jaǵdaılar jáne kommýnaldyq qyzmet salasy tarapynan atqarylǵan jumystardy saralaı kele, osyǵan jaýapty tulǵalarǵa naqty tapsyrmalar berdi.
Atap aıtqanda oblys basshysy qala jáne aýdandardaǵy shalǵaı eldi mekenderge qatynaıtyn joldardy qardan tazalap otyrý qajettigine toqtaldy. Ásirese, Atbasar, Tselınograd jáne Qorǵaljyn aýdandarynda kóktemgi sý tasqynyn aldy alý baǵytynda júzege asyrylatyn keshendi sharalardy baqylaýyna alatynyn eskertip ótti.
Keńesti qorytyndylaǵan oblys ákimi bıýdjettik baǵdarlamalardyń ákimshilerine «Nurly jol», «Jumyspen qamtýdyń jol kartasy-2020» tárizdi memlekettik baǵdarlamalarǵa bólinetin bıýdjet qarajatyn tıimdi ári der kezinde ıgerýdi qamtamasyz etýdi tapsyrdy.
