Kýlagın áleýmettik qorǵaý salasynyń mamandaryn kásibı merekelerimen quttyqtady
KÓKShETAÝ. QazAqparat - Aqmola oblysynyń ákimi Sergeı Kýlagın saltanatty jaǵdaıda áleýmettik qorǵaý salasynyń mamandaryn kásibı merekelerimen quttyqtady, dep habarlaıdy QazAqparat oblys ákiminiń baspasóz qyzmetine silteme jasap.
Eske sala keteıik, Qazaqstan Respýblıkasynyń Prezıdenti Nursultan Nazarbaevtyń 2011 jyldyń 20 qazandaǵy Jarlyǵymen qazan aıynyń sońǵy jeksenbisin áleýmettik sala qyzmetkerleriniń kásibı merekesi dep belgilengen bolatyn. Sodan beri jyl saıyn elimizde bul mereke atalyp keledi.
Óziniń quttyqtaý sózinde óńir basshysy bul mereke osy salada eńbek etip, qarttar men múgedekterge, kúnkórisi tómen otbasylarǵa qyzmet etip júrgen adamdarǵa degen zor qurmettiń, shynaıy alǵystyń belgisi dep atap ótti.
- Sizderdiń barlyq kúsh-jigerlerińiz eń aldymen, halyqtyń muń-muqtajyna tolyq jaýap beretin jáne qazirgi zamanǵy halyqaralyq standarttarǵa saı keletin áleýmettik qorǵaý júıesin damytýǵa baǵyttalady. Bir adamǵa kómek qolyn soza otyryp, sizder jalpy memlekettik tapsyrmany oryndap, ortaq mindetimiz - ár qazaqstandyqtyń áleýmettik ádildik pen kepildikke qol jetkizýin qamtamasyz etesizder. Qazaqstan Táýelsizdiginiń 25 jyldyq mereıtoıy jyly sizderdi merekelerińizben quttyqtaı otyryp, zor densaýlyq, baıandy baqyt, ashyq aspan, otbasylaryńyzǵa baqyt pen tynyshtyq, qyzmetterińizge mol tabys tileımin, - dedi oblys ákimi.
Kezdesý sońynda oblys basshysy atalmysh salanyń bir top qyzmetkerlerin «Eńbek ardageri» medalymen, «Áleýmettik-eńbek salasynyń úzdigi» tósbelgisimen jáne oblys ákiminiń alǵys hatymen marapattady. 
