Kýlagın aqmolalyq arýlardy 8 naýryz merekesimen quttyqtady
KÓKShETAÝ. QazAqparat - Aqmola oblysynyń ákimi Sergeı Kýlagın 8 naýryz - Halyqaralyq áıelder kúni qarsańynda óńirdegi názik jandarmen kezdesti, merekelerimen quttyqtady, dep habarlaıdy «QazAqparat» HAA tilshisi.
Kezdesýde aımaq basshysy qazirgi zamandaǵy áıelderdiń qoǵamdaǵy róline toqtalyp, eń birinshi áıel ana ekenin aıtyp, názik jandardy kele jatqan merekesimen quttyqtady.
«Búgingi kúni Aqmola oblysynda 7 myńnam astam kópbalaly ana bar, onyń 3 myńnan astamy «Altyn Alqa», qalǵany «Kúmis Alqa» ıegeri. Ásirese osy kúni Uly Otan soǵysynyń aýyrtpalyǵyn kótergen tyl eńbekkerlerine alǵysym sheksiz», -dedi S. Kýlagın.
Sonymen qatar, aımaq basshysy elimizde erlermen qatar san-túrli salada jumys istep kele jatqan áıelderdi erekshe atap ótip, oblystyń áleýmettik-ekonomıkalyq salasyn damytýda, qoǵamdyq-saıası ómirdi jandandyrýda, otbasyn nyǵaıtýda, jastardy tárbıeleýde áıelderdiń róli orasan zor ekenin aıtyp, olardyń eńbegine sheksiz alǵysyn jetkizdi.
Merekelik kezdesýde kópbalaly analarǵa oblys ákimi saltanatty túrde altyn jáne kúmis alqalardy tabys etti.
Atap ótý kerek, aımaqta bıyl QR Prezıdenti Jarlyǵymen 61 kópbalaly ana altyn jáne kúmis alqa ataǵyna ıe boldy.Sondaı-aq aımaqta túrli salany damytýǵa úles qosqan birqatar áıel aımaq basshysynyń alǵys hatymen marapattaldy.
