«Qulager» HK komandasynyń bastyǵy úsh jylǵa sottaldy

PETROPAVL. KAZINFORM — Petropavlda «Qulager» hokkeı klýby komandasynyń bastyǵy Sergeı Fılge qatysty alaıaqtyq deregi boıynsha qylmystyq is qaralyp, sot úkimi shyqty. 

Sot materıaldaryna sáıkes, 45 jastaǵy S. Fıl Aqmola oblysynyń týmasy, joǵary bilimdi, otbasyly, Petropavlda turyp, «Qulager» hokkeı klýbynda qyzmet atqarǵan. Buǵan deıin qylmystyq jaýapkershilikke tartylmaǵan.

Sottalýshy óz laýazymyn paıdalanyp senimge kirip, hokkeıshilerden qujat istep beremin dep úlken somada aqsha alǵan. 

Іsti qaraý barysynda aıyptalýshynyń kinási dáleldendi. Sot oǵan Qazaqstan Respýblıkasynyń Qylmystyq kodeksiniń 190-baby 3-bóligi boıynsha 3 jyl merzimge bas bostandyǵynan aıyrý jazasyn taǵaıyndady. Belgilengen jazany ol ortasha qaýipsizdik mekemesinde óteıdi.

Sot barysynda S. Fıl úsh adamǵa 800 myń, 500 myń jáne 600 myń teńgesin qaıtaryp berdi. Olardyń talaptary qanaǵattandyrylǵandyqtan, is boıynsha óndiris toqtatyldy.

Sondaı-aq, sot taǵy bir jábirlenýshiniń azamattyq talabyn qanaǵattandyrdy. Aıyptalýshydan jábirlenýshiniń paıdasyna 3 mln teńge mólsherinde keltirilgen materıaldyq shyǵyn óndirildi. Budan bólek, ókilderdiń qyzmetine jumsalǵan 1 mln teńge shyǵyndy óteý mindetteldi. Sondaı-aq sot sheshimimen memleket paıdasyna 31myń teńge mólsherinde memlekettik baj óndirildi jáne jábirlenýshilerdiń ótemaqy qoryna 78 myń teńge tóleý júkteldi.

Buǵan deıin Qostanaılyq bloger kásipkerden 20 mln teńge bopsalaǵany úshin 7,5 jylǵa sottalǵanyn jazǵan edik.