«Qulager» eskertkishiniń avtory Sádibek Túgel 65 jasqa toldy
KÓKShETAÝ. QazAqparat - Belgili qoǵam qaıratkeri, jazýshy, jýrnalıst, pýblıtsıst Sádibek Túgel 65 jasqa toldy, dep habarlaıdy QazAqparat tilshisi.
Sádibek Túgel 1955 jyly 23 aqpanda Shyǵys Qazaqstan oblysy Ulan aýdanynyń Amankeldi aýylynda dúnıege kelgen.
1980 jyly Qazaq Memlekettik ýnıversıtetiniń jýrnalıstıka fakýltetin, 1990 jyly Almatydaǵy polıtologııa-basqarý ınstıtýtyn (burynǵy joǵarǵy partııa mektebin) támamdaǵan. Áskerı mindetin atqaryp kelgen soń, Almaty maqta ıirý fabrıkasynda slesar bolyp jumys istegen.
1977–1978 jyldary Ulan aýdandyq «Rastsvet» – «Órken» gazetinde aýdarmashy, 1978–1979 jj. Ulan aýdandyq atqarý komıtetiniń uıymdastyrý bóliminde nusqaýshy, 1979–1984 jyldary Ulan aýdandyq partııa komıtetiniń uıymdastyrý bóliminiń meńgerýshisi, 1990–1991 jyldary aýdandyq halyqtyq baqylaý komıtetiniń tóraǵasy, 1991–1992 jyldary halyq depýtattary aýdandyq Keńesiniń tekserý komıssııasynyń tóraǵasy, 1992–1994 jyldary aýdandyq «Ulan tańy» – «Ýlanskıe zorı» gazetiniń redaktory qyzmetterin atqarǵan. Memlekettik emtıhan komıssııasynyń 1990 jylǵy sheshimimen polıtolog, joǵarǵy jáne orta dárejeli oqý oryndarynda áleýmettik-saıası máseleleriniń oqytýshysy mamandyǵyn alǵan.
1994–1998 jyldary «Qazaq Televızııasy men Radıosy» Korporatsııasynda jaýapty qyzmetter atqaryp, 1998–2003 jyldary elordamyz – Astana qalasy ákiminiń baspasóz hatshysy, baspasóz ortalyǵynyń jetekshisi, Astana Halyqaralyq baspasóz ortalyǵynyń bas dırektory mindetin atqarǵan. 2003–2005 jyldary Qazaqstan Respýblıkasy Parlamenti Senatynyń buqaralyq aqparatpen baılanys bóliminiń meńgerýshisi bolyp qyzmet etken. Qazir Qazaqstan Respýblıkasy Ulttyq at sporty túrleri federatsııasynyń Prezıdenti bolyp qyzmet atqarady.
Áńgimeleri gazet, jýrnaldarda jarııalanyp turady. «Qaıdasyń, qazaǵymnyń qazanaty?!» derekti povesiniń, «Asyl jırenniń kıesi» áńgimeler jınaǵynyń avtory.
Sonymen qatar, ol 2010 jyly «Nur-Sultan – Kókshetaý» tasjolynyń boıynda ornatylǵan Aqan seriniń «Qulagerine» arnalǵan eskertkish ıdeıasynyń avtory. Ol bul týraly: «Bul eskertkish – jáı ǵana tas emes, ol Uly Dalanyń – qasıetti sımvoly! Ultymyzdyń altyn tarıhy, kıeli qundylyǵy!...», dep bir sózinde atap ótken edi.
